Ժնևում երեկ տեղի ունեցավ Օրհուսի կոնվենցիայի համապատասխանության կոմիտեի նիստը: Նիստի ընթացքում առաջինը քննվել է Հայաստանի հարցը:
Ինչպես PanARMENIAN.Net-ին հայտնում է ՄԻԺԻ-ի (Մարդու իրավունքների և ժողովրդավարության ինստիտուտ) հիմնադիր Արմինե Առաքեյանը` Հայաստանի հանրային կառավարման մարմինները բացակայում էին ու կոմիտեին չէին ուղարկել պահանջված զեկույցն ու գործողությունների ծրագիրն այն մասին, թե ինչպես են պատրաստվում իրագործել Թեղուտի վերաբերյալ կոնվենցիայի և կոմիտեի պահանջները:
Հայաստանից նիստին մասնակցում էր հանրային կողմը, ի դեմս սփյուռքի և Հայաստանի ինքնորոշված քաղաքացիների 4 հոգանոց պատվիրակության: Նրանք ներկայացրին խնդիրն և ժողովրդի գոյությանն ու անվտանգությանը սպառնացող ՀՀ կառավարության որոշումները, որոնք հակասում են ՀՀ օրենքներին ու Կոնվենցիայի պարտավորություններին:
Կոմիտեի անդամներն ու նախագահը ողջունել են Հայաստանի հանրության մասնակցությունն ու կարևոր դիտողությունները: Նրանք արձանագրել են, որ հաշվի կառնեն հիմնախնդրի և իրավիճակի լրջությունը և իրենց լիազորությունների սահմաններում կփորձեն ազդարարել և ավելի խստորեն հետամուտ լինել ՀՀ իշխանությունների կողմից Կոմիտեի պահանջների կատարմանը:
Օրհուսի կոնվենցիան ուժի մեջ է մտել 2001թ. հունիսին Օրհուսում (Դանիա) և ներկայումս ունի 45 կողմնակից պետություն: Կոնվենցիան ձգտում է զարգացնել թափանցիկությունն ու հաշվետվողականությունը հանրային կառավարման մարմինների (իշխանությունների)` շրջակա միջավայրին առնչվող որոշումների և գործունեության վերաբերյալ:
