Այսօր ՄԱԿ-ում անգլերենի օրվան նվիրված միջոցառման ժամանակ ուսանողները, դասախոսները, պաշտոնական անձինք, դեսպանությունների ներկայացուցիչներն ու լրագրողները հավելյալ հնարավորություն ունեցան տեղեկանալու անգլերենի՝ՄԱԿ-ի 6 պաշտոնական լեզուներից մեկի օգտակարության և կարևորության մասին: Այս մասին PanARMENIAN.Net-ին հայտնում են ՄԱԿ-ի հայաստանյան գրասենյակից:
Միջոցառումը կազմակերպել էր ՄԱԿ-ի հանրային տեղեկատվության վարչությունը Վ. Բրյուսովի անվան Երեևանի պետական լեզվաբանական համալսարանի հետ համատեղ:
Լեզվաբանական համալսարանի ռեկտորը, ՄԱԿ-ի, Հայաստանում Ամերիկայի Միացյալ Նահանգների դեսպանության, Ամերիկյան և Բրիտանական խորհուրդների ներկայացուցիչները ողջունեցին միջոցառման մասնակիցներին, խոսեցին ՄԱԿ-ում անգլերենի կարևորության մասին:
Միջոցառման ընթացքում համալսարանի բարձր կուրսերի ուսանողները ներկայացրեցին բեմականացում բրիտանացի լեզվաբան Դեյվիդ Քրիսթըլի «Շարունակելով ապրել» ստեղծագործության հիման վրա, որը նվիրված է լեզուների պաշտպանության և առաջմղման կարևորությանը:
Արաբերենը, չինարենը, անգլերենը, ֆրանսերենը, ռուսերենը և իսպաներենը ՄԱԿ-ի վեց պաշտոնական լեզուներն են: Անգլերենը երկրորդն է աշխարհի ամենատարածված լեզուների թվում, համաձայն ՅՈՒՆԵՍԿՕ-ի տվյալների:
2010 թ.սկսած ՄԱԿ-ի Հանրային տեղեկատվության վարչությունը Նյու Յորքում հայտարարել է «ՄԱԿ-ում լեզուների օրեր» նախաձեռնության մեկնարկի մասին՝ ուղղված լեզվական և մշակութային բազմազանության պահպանմանն ու խթանմանը: ՄԱԿ-ի հանրային տեղեկատվության վարչության երևանյան գրասենյակը գործընկերների հետ միասին 2012 թ. ընթացքում նշում է ՄԱԿ-ի պաշտոնական բոլոր լեզուների օրերը:
