Ալթայի հանրապետության իրավապահ մարմինները ձերբակալել են Հայաստանի երկու քաղաքացիների, որոնք փորձել են ոսկի արդյունահանող ձեռնարկության տարածքից դուրս տանել գրեթե երկու ցենտներ թանկարժեք մետաղներ պարունակող ապար, հաղորդում է ՌԻԱ Նովոստին:
Գերատեսչության տվյալներով, 2013-ի հունվարի 11-ին Լեռնային Ալթայում Հայաստանի երկու քաղաքացիներ Արթուր Մկրտչյանը և Կարեն Խոստեղյանը հանրապետական ՆԳՆ աշխատակցին տվել են 100 հազար ռուբլի: Դրա դիմաց նա պետք է ապահովեր Լեռնային Ալթայի տարածքում թանկարժեք մետաղների անարգել տեղափոխությունը: Հաջորդ օրը տղամարդիկ ոսկի արդյունահանող «Ռուդնիկ վեսյոլի» ԲԲԸ-ի աշխատողին հանձնել են 735 հազար ռուբլի: Այդ փողի դիմաց պետք է ապահովվեր նրանց ազատ մուտքը հանքավայրի տարածք, որտեղ նրանք պատրաստվում էին ձեռք բերել թանկարժեք մետաղներ պարունակվող ապար և հետագայում դուրս բերել գործարանի տարածքից:
«Չարագործները փորձել են անօրինական կերպով գործարանի տարածքից դուրս հանել ավելի քան 190 կգ թանկարժեք մետաղներ պարունակող ապար: Ներկա պահին Խոստեղյանը և Մկրտչյանը ձերբակալվել են, նրանց նկատմամբ կիրառվել է խափանման միջոց կալանքի տեսքով»,- ասվում է հաղորդագրությունում:
Տղամարդկանց նկատմամբ հարուցվել է քրեական գործ կանխահայտորեն անօրինական գործողությունների և պաշտոնատար անձին խոշոր չափի կաշառք տալու մասին:
