ՀՀ փոխվարչապետ, տարածքային կառավարման նախարար Արմեն Գևորգյանի մոտ այսօր կայացած խորհրդակցությանը քննարկվեցին կոշտ կենցաղային թափոնների կառավարման ոլորտում Ասիական զարգացման բանկի (ԱԶԲ) ֆինանսական աջակցությամբ իրականացվող ծրագրի հետ կապված հարցեր: Խորհրդակցությանը մասնակցում էին ՀՀ տարածքային կառավարման, էկոնոմիկայի նախարարությունների, Ասիական զարգացման բանկի երևանյան գրասենյակի ներկայացուցիչներ: Նշենք, որ ՀՀ կառավարության և ԱԶԲ համագործակցությամբ իրականացվող ծրագրի նպատակը ոլորտի ազգային ռազմավարական տեսլականի սահմանումն ու պլանավորումն է, տարբեր գերատեսչությունների և ինստիտուցիոնալ կարողությունների համակարգման անհրաժեշտությունը:
Խորհրդակցության ընթացքում ներկայացվեցին Հայաստանում կոշտ կենցաղային թափոնների կառավարման այն սցենարները, որոնք մշակվել են խորհրդատու թիմի կողմից: Փոխվարչապետը հանձնարարեց նյութերը տեղադրել Տարածքային կառավարման և Էկոնոմիկայի նախարարությունների կայքերում` հանրությանը հասանելի դարձնելու համար:
ՏԿՆ հասարակայնության հետ կապերի բաժնից հայտնում են, որ Տարածքային կառավարման և Էկոնոմիկայի նախարարությունների ներկայացուցիչներին հանձնարարվեց նաև ներկայացված լուծումների վերաբերյալ մեկ ամսվա ընթացքում քննարկումներ կազմակերպել շահագրգիռ պետական մարմինների, այդ թվում` Ազգային ժողովի, Վերահսկիչ պալատի, Հանրային խորհրդի, Կայուն զարգացման ազգային խորհրդի, ինչպես նաև քաղաքացիական հասարակության ներկայացուցիչների հետ, և քննարկումների արդյունքներով ՀՀ կառավարություն առաջարկություններ ներկայացնել իրականացվող ուսումնասիրությունների հետագա ընթացքի վերաբերյալ:
