«Վճարում ենք 100 դրամ» քաղաքացիական նախաձեռնությունը դատապարտում է այսօր «Ռոսիա» տոնավաճառի դիմաց երթուղայինի վարորդի ու ուղևորի միջև վեճի արդյունքում տեղի ունեցած դանակահարությունը: Ահա թե ինչ է ասվում նրանց տարածած հաղորդագրության մեջ.
«Վճարում ենք 100 դրամ» շարժման մասնակիցները դատապարտում են որևէ տեսակի բռնություն, վիրավորանք կամ այլ անօրինական քայլ, որն ուղղված կլինի այլ քաղաքացիների, ոստիկանների կամ որևէ այլ մարդու դեմ: Պահանջում ենք, որպեսզի ՀՀ ոստիկանությունը արագ բացահայտի և պատասխանատվության ենթարկի բոլոր մեղավոր կողմերին: Միաժամանակ անթույլատրելի կհամարենք, եթե ոստիկանությունն օգտագործի սույն միջադեպը տրանսպորտային կանգառներում իրենց խաղաղ բողոքի իրավունքն իրացնող քաղաքացիների գործունեությունը սահմանափակելու համար:
Մենք` ՀՀ քաղաքացիներս, Երևանի բնակիչներս՝ հիմք ընդունելով իրավունքի գերակայության ու սահմանադրականության սկզբունքները և առաջնորդվելով բացառապես խաղաղ ու ոչ բռնի պայքարի սկզբունքներով, բոլոր մասնակիցներին կրկին անգամ հիշեցնում ենք, որ տրանսպորտի թանկացման դեմ մեր պայքարը կրում է խաղաղ բնույթ և ընթանում է իրավունքի գերակայության շրջանականերում, ուստի կոչ ենք անում բոլորին գործել միմիայն իրավունքի ու քաղաքացիականության սահմաններում՝ հարգելով միմյանց իրավունքները և ազատությունները»:
