Բիրյուլովոյի իրադարձություններից հետո ՌԴ պաշտոնյաների ու ուժային կառույցների եզրակացությունները գրեթե նույնն են, ինչ նրանք, որ արվել են 2010 թվականի վերջում Մանեժում տեղի ունեցած անկարգություններից և ընթացիկ տարում օպերատիվ աշխատակիցներին ծեծի ենթարկելու միջադեպից հետո Մատվեևսկի շուկայում՝ հակաիմիգրանտական շուրջկալներ, դատախազական ստուգումներ, քրեական գործերի հարուցում: Նոր է ոչ պաշտոնական հրահանգը ոստիկաններին՝ ձերբակալել «բոլոր այն կովկասցիներին», որոնց մոտ կհայտնաբերվեն դանակներ ու ատրճանակներ, գրում է ՌԲԿ-ն:
Դատելով պաշտոնյաների առաջին հայտարարություններից՝ արձագանքը գրեթե նույնն է: Գրեթե բոլոր 380 բերման ենթարկվածներն ազատ են արձակվել, նրանցից 70-ը տուգանվել են 100-3000 ռուբլով ոստիկաններին չհնազանդվելու համար: «Խուլիգանություն» հոդվածով քրեական գործ է հարուցվել միայն երկու մարդու դեմ, որոնց ագրեսիվ գործողությունները գրանցել են հեռուստախցիկները:
Հոկտեմբերի 13-ին մոսկովյան Արևմտյան Բիրյուլովո թաղամասում անկարգությունների առիթ է դարձել հոկտեմբերի լույս 10-ի գիշերը տեղի բնակիչ 25-ամյա Եգոր Շչերբակովի սպանությունը: Սկզբում որպես «ժողովրդական հավաք» կազմակերպված ցույցը վերածվել էր անկարգությունների: Մասնակիցները մեղադրում էին ոստիկանությանը, որը, իբր, պատշաճ չի կատարում իր պարտականությունները, տեղաբնակները շրջանի պարեկում են կազմակերպել: Ակցիայի ագրեսիվ տրամադրված մասնակիցների մի մասը՝ մոտ 1000 մարդ, ազգայնամոլների ու ֆուտբոլային ֆանատների առաջնորդությամբ կոտրել է «Բիրյուզա» առևտրային կենտրոնի ցուցափեղկերը, իսկ հետո շարժվել դեպի բանջարեղենի բազա, որտեղ միգրանտներ են աշխատում:
«Ինտերֆաքսը», իրավապահների վրա հղումով, հայտնում է, որ վրդովված մարդիկ ջարդել են բազայի դարպասները, վնասել սառնարանները, կոտրել կայանած մեքենաները, ջախջախել ձմերուկների առևտրի տաղավարը: Կեսգիշերից հետո իրավիճակը հաջողվել է համեմատաբար կայունացնել հատուկ ուժերի միջամտությամբ:
