ՊՊԾ գնդում հուլիսի 27-ից «Սասնա ծռեր» խմբի կողմից որպես պատանդ պահվող բժիշկներից Սալվադոր Խեչոյանը «Արմենիա» հեռուստաընկերության հետ հեռախոսազրույցում պատասխանել է հարցերին ու պատմել, որ իրենց գնդում որպես պատանդ են պահում: Նա դրական է պատասխանել հարցին, արդյոք զինյալներին բացատրել են, որ բժիշկներին պատանդ վերցնելն ու պահելն արգելված է միջազգային բոլոր կոնվենցիաներով: Հարցազրույցը ներկայացնում ենք ամբողջությամբ.
«- Դուք հիմա ՊՊԾ գնդի տարածքո՞ւմ եք:
– Այո:
– Ձեզ այդտեղ որպես պատա՞նդ են պահում:
– Այո:
– Կա՞ն այդտեղ հիվանդներ, որոնք հոսպիտալացման կարիք ունեն:
– Մեկ հոգի կա:
– Ձեր ունեցած դեղորայքով կարողանո՞ւմ եք լիարժեք օգնել:
– Ոչ:
– Ձեր մյուս գործընկերները նույն վիճակում են՝ ինչ դո՞ւք:
– Այո:
– Իսկ հիվանդների բուժումը գնդի տարածքում հնարավո՞ր է:
– Ոչ:
– Զինված խմբին բացատրե՞լ եք, որ բժիշկներին պատանդ վերցնելն ու պահելն արգելված է միջազգային բոլոր կոնվենցիաներով:
– Այո»:
Առավոտյան ոստիկանության մամուլի խոսնակը տեղեկացրել էր, որ Էրեբունու ՊՊԾ գունդը գրաված «Սասնա ծռեր» խումբը պատանդել է գնդի տարածք մտած բժիշկներին:
Առողջապահության նախարարության մամուլի խոսնակ Անահիտ Հայթայանն, իր հերթին, հայտնել է, որ պատանդ են վերցվել 4 հոգի՝ «Շտապօգնության» բուժաշխատողներ Նորայր Թևանյանը ու Սալվադոր Խեչոյանը, բուժակ Դավիթ Տոնոյանն և բուժքույր Մալինա Մարգարյանը: «Ամբողջ աշխարհում անընդունելի, դատապարտելի երևույթ է, երբ փորձ է արվում ձեռք բարձրացնել մարդասիրական առաքելություն իրականացվող մասնագետների նկատմամբ», – նշել է նա:
