Ոստիկանության Կոտայքի բաժնում տեղեկություններ են ստացվել, որ աշխատանքի և սոցիալական աջակցության Աբովյանի տարածքային գործակալության աշխատակից Մ. Սարգսյանը մի քանի բնակիչներից որպես կաշառք պահանջել է և ստացել է օրենքով նախատեսված նպաստների մի մասը: Այս մասին հայտնում է ոստիկանության պոշտանական կայքը:
Կազմակերպված հանցավորության դեմ պայքարի գլխավոր վարչության և Կոռուպցիայի ու տնտեսական հանցագործությունների հակազդման վարչության աշխատակիցների համատեղ միջոցառումների արդյունքում պարզվել է այն անձանց շրջանակը, որոնցից Սարգսյանը կաշառք է պահանջել ու ստացել:
«Մի կնոջից Սարգսյանը 2013-ից մինչև 2018 թվականը պարբերաբար փող է վերցրել, ընդհանուր առմամբ 108 հազար դրամ, որպեսզի նա մնա սոցիալական օգնության ծրագրում և շարունակի ստանալ գումարը: Մեկ ուրիշի դեպքում ստացած գումարը կես մլն-ից ավելի է եղել»,-մանրամասնում են ոստիկանությունից:
Քաղաքացիները նշել են, որ Մ. Սարգսյանի առաջարկից հրաժարվելու դեպքում կտրվել են նպաստից:
«Երկու տարվա մեկ տարին տվել եմ իրան»,-պատմել է քաղաքացիներից մեկը:
Մ. Սարգսյանը բերման է ենթարկվել ոստիկանության Կոտայքի բաժին: Հանգամանքները պարզում են, փաստի առթիվ Քրեական օրենսգրքի կաշառք ստանալու և կաշառք տալու հատկանիշներով հարուցվել են քրեական գործեր: Նախաքննությունը շարունակվում է:
