ՀՀ նախկին ոստիկանապետ, ՀՀԿ-ական պատգամավոր Ալիկ Սարգսյանը միջնորդագիր է ներկայացրել Նորք-Մարաշ զինված խմբի գործով ձերբակալված «Հայրենիք և պատիվ» կուսակցության ղեկավար, ՃՈ նախկին պետ Գառնիկ Մարգարյանի կալանքը փոխելու համար: Այդ մասին գրում է «Ժողովուրդ» թերթը:
Միջնորդագիրը Սարգսյանը ներկայացրել է ՀՀԿ խմբակցությունից հեռացած, գեներալ պատգամավոր Ֆելիքս Ցոլակյանի հետ:
«75 տարեկան, հիվանդ մարդ է, տարել նստացրել են»,- ասել է Սարգսյանը «Ժողովուրդ» օրաթերթին ` նշելով, որ գնդապետ Մարգարյանը մասնակցել է պետականաշինության գործին:
Խոսելով այն մասին, թե ինչու ՀՀԿ իշխանության ժամանակ ինքը նման նախաձեռնությամբ հանդես չէր գալիս՝ Ալիկ Սարգսյանն ասել է. «Հիմա` այս փուլում, ես ավելի ազատ եմ»: Նա նաև մեկնաբանել է, որ «ազատ» ասելով` միանգամայն այլ բան նկատի ունի.«Մինչ այդ քննություն էր գնում, ասում էի` չխանգարեմ իմ պատգամավորական միջնորդությամբ»:
