Երևանի նախկին քաղաքապետ Տարոն Մարգարյանը դեռ չի հրավիրվել ԱԱԾ, բայց կհրավիրվի առաջիկայում: Այդ մասին հայտարարել է Ազգային անվտանգության ծառայության տնօրեն Արթուր Վանեցյանը՝ վստահեցնելով, որ ԱԱԾ-ն աշխատում է բոլոր ուղղություններով:
«Ես ասել եմ ու նորից ուզում եմ կրկնել՝ մենք բազմիցս նշել ենք, որ անկախ մարդու զբաղեցրած պաշտոնից, դիրքից, անունից, եթե մենք ստացանք ստույգ, օպերատիվ տվյալներ, որ տվյալ մարդն իրականացրել է այս կամ այն օրինախախտումը, մենք իրականացնելու ենք համապատասխան միջոցառումներ», – ասել է Վանեցյանը լրագրողների հետ զրույցում, հայտնում է Aysor.am-ը:
Նա նշել է, որ «Երևան» հիմնադրամում ստուգումները հասնում են ավարտական փուլին: «Ուղղակի հիմանդրամի ստուգումների ծավալն այնքան մեծ է, որ մինչև հիմա ստուգումները ընթանում են», – ասել է նա:
ԱԱԾ տնօրենը հավելել է, որ ապօրինի հարստացած պաշտոնյաների վերաբերյալ նոր նյութեր կան, որոնք բավականին մեծ ծավալի են: Այն հարցին, թե կան նրանց թվում աղմկոտ անուններ, նա պատասխանել է՝ այո:
Հուլիսի 9-ին Երևանի 11-րդ քաղաքապետ Տարոն Մարգարյանը հրաժարական է տվել:
Երևանի քաղաքապետարանի վարչական շենքում տեղակայված «Երևան» հիմնադրամի աշխատասենյակներում քրեական գործով կատարվել էր խուզարկություն: Իրականացվել են լայնածավալ օպերատիվ-հետախուզական միջոցառումներ և քննչական գործողություններ` քաղաքացիներից գումարների հավաքագրման հանգամանքները, ծախսերի ուղղությունները և նպատակայնությունը, ինչպես նաև օրինականությունը պարզելու ուղղությամբ:
Նյութերի նախապատրաստման ընթացքում պարզվել է, որ վերոնշյալ պատրվակով առձեռն ստացված գումարների մի մասը հիմնադրամի հաշվեհամար չի մուտքագրվել և հափշտակվել է:
