ՀՀ կառավարությունը 5.7 մլրդ դրամ կամ $11.7 մլն կհատկացնի թոշակառու 1141 զինվորականի ընտանիքի՝ բնակարանային խնդրի լուծման համար: Համապատասխան որոշման նախագիծն ընդգրկված է գործադիրի դեկտեմբերի 27-ի նիստի օրակարգում:
Բնակարան կստանան 2018 թվականի դեկտեմբերի 1-ի դրությամբ զինվորական ծառայության ընթացքում որպես բնակարանային պայմանների բարելավման կարիք ունեցող հաշվառված և առողջության, տարիքի կամ երկարամյա ծառայության զինվորական կենսաթոշակի անցնելու կապակցությամբ ծառայությունից արձակված նախկին զինծառայողների ընտանիքները, որոնցից 326-ը հաշվառված է քաղաք Երևանում:
Գումարը կհատկացվի ՀՀ 2018 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդից:
Ավելի վաղ ՀՀ վարչապետի պաշտոնակատար Նիկոլ Փաշինյանը ֆեյսբուքյան իր էջում գրել է, որ կառավարությունն առաջիկա որոշումներով պատրաստվում է վերակառուցել ՀՀ զինված ուժերի մի քանի հազար սպայի և ենթասպայի նախկինում վերցրած վարկերը:
«Որոշման իմաստը այդ վարկերի տոկոսադրույքը մինչև կիսով չափ կրճատելն է և սպասարկման ժամկետը երկարացնելը: Որպես արդյունք, ասենք եթե ԶՈւ ծառայողը ամեն ամիս վարկի սպասարկման (մարման) համար վճարում է 50,000 դրամ, նախատեսվող փոփոխություններից հետո այդ նույն, բայց վերակառուցված վարկի համար կսկսի վճարել ասենք՝ 250,000 դրամ: Մինչև կիսով չափ քիչ»,- գրել է Փաշինյանը:
