Ապրիլի 7-ին` Սուրբ Աստվածածնի ավետման տոնին, Ամենայն Հայոց Գարեգին Բ կաթողիկոսի հանդիսապետությամբ, կատարվել է Ստեփանակերտի Սուրբ Աստվածածին առաջնորդանիստ եկեղեցու օծման արարողությունը:
Արարողությանը ներկա էին Արցախի Հանրապետության նախագահ Բակո Սահակյանը, ԼՂՀ Ազգային Ժողովի նախագահ Աշոտ Ղուլյանը, Արցախի թեմի հոգևոր սպասավորներ, Արցախի և Հայաստանի Հանրապետության իշխանությունների ներկայացուցիչներ, եկեղեցու կառուցմանն իրենց աջակցությունը բերած բարերար հայորդիներ, Հայաստանի տարբեր թեմերից ժամանած եկեղեցականներ, ուխտավորներ և հավատավոր բազում արցախցիներ:
Օծման արարողության ժամանակ ջրով և գինով լվացվել են տաճարի Սուրբ Սեղանը և օծվելիք սյուները: Այնուհետև Հայոց Հայրապետը սրբալույս մյուռոնով օծել է եկեղեցու Սուրբ սեղանը։ Թեմակալ առաջնորդ Գերաշնորհ Տ. Պարգև արքեպիսկոպոս Մարտիրոսյանի և այլ երպիսկոպոսների ձեռամբ օծվել են խորանի` չորս ավետարանիչների անունը կրող սյուները և եկեղեցու մնացյալ սյուները:
Աղոթքներից և սուրբգրային ընթերցվածքներից հետո Ամենայն Հայոց կաթողիկոսը նորակառույց եկեղեցին անվանակոչել է Սուրբ Աստվածածին:
Օծման արարողության ավարտին Նորին Սրբություն Գարեգին Բ կաթողիկոսը «Պահպանիչ» աղոթքով օրհնել է արցախահայությանը և Սուրբ Ավետման տոնի և եկեղեցու օծման առիթով իր հայրապետական պատգամը բերել ներկա ժողովրդին:
