ՀՀ ԱԳ նախարար Արարատ Միրզոյանը հայտարարել է, որ Ադրբեջանի հետ խաղաղությունը հաստատված է, բայց չի նշանակում, որ ամբողջ ճանապարհն անցել ենք։ Այդ մասին նա ասել է Հանրային հեռուստատեսությանը տված հարցազրույցում։
Նա հավելել է, որ կողմերին հաջողվել է կարգավորել զգալի թվով հարցեր, սակայն որոշ առանցքային թեմաների շուրջ դեռևս փոխըմբռնում ձեռք չի բերվել, առկա խնդիրները ենթակա են հասցեագրման։
«Կան կարևոր հարցեր, որոնց շուրջ համաձայնություն չկա, պետք է շարունակենք աշխատանքը»,-ասել է Միրզոյանը։
Նա նաև ասել է, որ ՀՀ և Ադրբեջանի միջև խաղաղության պայմանագրի տեքստի լրամշակման կարիք չկա՝ այն համաձայնեցվել է 2025–ի մարտին և վավերացվել օգոստոսին։
«Հիմա պետք է պայմանավորվել ստորագրման վայրի և ժամանակի մասին։ Առայժմ պայմանավորվածություն չկա»,- ասել է Միրզոյանը։
Օգոստոսի 8–ին Սպիտակ տանը կայացած ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի եռակողմ հանդիպմանը ստորագրվել է համատեղ Հռչակագիր` Վաշինգտոնում տեղի ունեցած հանդիպման արդյունքների մասին:
Վաշինգտոնում Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը Հայաստանի, Ադրբեջանի և ԱՄՆ ղեկավարների ներկայությամբ նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։
