Շախմատի համաշխարհային օլիմպիադայի հաղթող Հայաստանի պատանեկան հավաքականը դեկտեմբերի 9-ին հանդիպել է լրագրողների հետ:
Բացի թիմային հաղթանակից, հայ շախմատիստները աչքի ընկան նաև անհատական արդյունքներով. Կարեն Գրիգորյանը, Հովհաննես Գաբուզյանն ու Դավիթ Շահինյանը ոսկե մեդալներ նվաճեցին իրենց խաղատախտակների վրա:
Գաբուզյանը նշել է, որ դեռ մինչ Օլիմպիադայի մեկնարկը հավաքի ժամանակ բարձր էր թիմային ոգին և տղաների տրամադրությունը բարձր էր:
Դավիթ Շահինյանը գտնում է, որ դեռ մարզումների ժամանակ հայտնի դարձավ, որ ՀՀ հավաքականը կպայքարի ոսկու համար:
Կարեն Գրիգորյանն ասաց, որ Ռուսաստանի ու Պորտուգալիայի թիմերին հաղթելուց հետո, նրանք զգացին, որ ամեն ինչ բարեհաջող է դասավորվում: «Մենք հասկացանք, որ շատ ուժեղ ենք, հատկապես երբ 6-րդ տուրում հաղթեցինք Թուրքիայիի ուժեղ թիմին»,-ասել է Գրիգորյանը:
Իսկ Ռոբերտ Աղասարյանը գտնում է, որ Հայաստանի հավաքականը ուժեղ էր, որովհետև նրանք լավ են ճանաչում միմյանց և մտերիմ են: «Մեզ համար շատ կարևոր էր լավ հանդես գալ Թուրքիայում: Ամենաանմոռանալի պահը Թուրքիայում կայացած Օլիմպիադայում այն էր, երբ հնչեց Հայաստանի օրհներգը»:
Ըստ Տիգրան Պետրոսյանի, չնայած, որ հավաքականը 9 անընդմեջ հաղթանակ տարավ, ոսկե մեդալները հեշտ չտրվեցին: «Նույնիսկ թույլ թիմերը փորձում էին ավելի հավաքված խաղալ: Սակայն մենք բոլորի հետ նույն տեմպով էինք խաղում և թուլ չէինք տալիս մեզ թուլանալ»:
