Հայաստանին ՀԱՊԿ-ում (Հավաքական անվտանգության պայմանագրի կազմակերպության) ձայնի իրավունքից զրկելու որոշում կայացնելու համար կպահանջվի անդամ պետությունների կոնսենսուս, հայտարարել է ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը։
«ՀԱՊԿ Հավաքական անվտանգության խորհրդի հերթական նստաշրջանը կանցկացվի նոյեմբերի 11-ին Մոսկվայում, և պետությունների ղեկավարները, հավանաբար, կքննարկեն այս հարցը։ Եթե դրա անհրաժեշտությունը լինի, ապա որոշումը կընդունվի կոնսենսուսով», – ասել է Վասիլևը, հայտնում է ՌԻԱ Նովոստին:
Նրա խոսքով՝ ՀԱՊԿ կանոնադրության 25-րդ հոդվածը նախատեսում է պետության՝ քվոտային պաշտոններում իր քաղաքացիներին առաջադրելու իրավունքի, ինչպես նաև կազմակերպության մարմիններում ձայնի իրավունքի կասեցման հնարավորություն, եթե երկիրը երկու տարվա ընթացքում չի կատարում կազմակերպության բյուջեի նկատմամբ ունեցած պարտավորությունները։
«Դե ֆակտո այս իրավիճակն արդեն գործում է ավելի քան երկու տարի, քանի որ Հայաստանը չի առաջադրում իր քաղաքացիներին քարտուղարությունում քվոտային պաշտոնների համար, ինչպես նաև հետ է կանչել իր ներկայացուցիչներին ՀԱՊԿ Միացյալ շտաբից», – եզրափակել է նա։
ՀԱՊԿ անդամ են Ռուսաստանը, Բելառուսը, Հայաստանը, Ղազախստանը, Ղրղզստանը և Տաջիկստանը։
Հայաստանը 2024 թվականին սառեցրել է իր մասնակցությունը ՀԱՊԿ-ին։ Հանրապետության վարչապետ Նիկոլ Փաշինյանը նախկինում հայտարարել էր, որ 2021–2022 թվականներին դաշնակիցները ՀՀ նկատմամբ չեն կատարել Հավաքական անվտանգության պայմանագրով նախատեսված իրենց պարտավորությունները։
Հունիսի 10-ին Ռուսաստանի արտաքին գործերի նախարար Սերգեյ Լավրովը հայտարարել էր, որ Հայաստանի կողմից անդամավճարների չվճարման պատճառով կազմակերպությունը կքննարկի կանոնադրության այն հոդվածի կիրառման հնարավորությունը, որը կարգավորում է իրենց պարտավորությունները չկատարող անդամ պետությունների նկատմամբ ձեռնարկվող միջոցները։
