Ղազախստանի ներքին գործերի նախարարությունը մշակել և «Բաց իրավական ակտեր» հարթակում հրապարակել է կառավարության որոշման նախագիծ, որով նախատեսվում է օտարերկրացիների համար երկիր մուտք գործելու վճարովի էլեկտրոնային թույլտվությունների ձևակերպում։
Թույլտվության ձևակերպման արժեքը դեռևս հայտնի չէ, գրում է Meduza-ն:
ՆԳՆ-ի նախագծում նշվում է, որ «վճարի տարբերակված մոտեցումը» հնարավորություն կտա կուտակել միջոցներ՝ թվային ենթակառուցվածքի սպասարկման և անձնական տվյալների պաշտպանության համար, սակայն ակնկալվող գումարները չեն ներկայացվում։ Վճարովի էլեկտրոնային թույլտվությունների ներդրումը նախատեսվում է իրականացնել 2026 թվականի օգոստոսից մինչև դեկտեմբեր։
Digital Business-ը ուշադրություն է հրավիրում այն հանգամանքի վրա, որ նախագծում չեն նշվում այն օտարերկրացիների կատեգորիաները, որոնց համար մուտքի թույլտվությունը պարտադիր կլինի, ուստի հայտարարել, թե այն կվերաբերի բոլորին, «առայժմ վաղաժամ է»։
ՆԳՆ-ի նախագիծը մշակվել է միգրացիոն վերահսկողության արդիականացման և թվայնացման վերաբերյալ նախագահի հանձնարարականի կատարման շրջանակում։ Հունիսին Ղազախստանի նախագահ Կասիմ-Ժոմարտ Տոկաևը ստորագրել է օրենք, որով փոփոխություններ են կատարվել միգրացիայի մասին օրենսդրության մեջ, և հենց այդ փաստաթղթով է ամրագրվել երկիր մուտք գործելու էլեկտրոնային թույլտվություն սահմանելու հնարավորությունը։
Մինչև օգոստոսի 17-ը նախագիծը գտնվելու է հանրային քննարկման փուլում։
Ղազախստանը, որտեղ Ռուսաստանի քաղաքացիները կարող են մուտք գործել առանց վիզայի և որևէ հատուկ թույլտվության, Ուկրաինայում պատերազմի և Ռուսաստանում հայտարարված զորահավաքից հետո դարձել է զանգվածային արտագաղթի հիմնական ուղղություններից մեկը։ Երկրում վեց ամսվա ընթացքում 90 օր գտնվելուց հետո անհրաժեշտ է ստանալ ժամանակավոր բնակության թույլտվություն։
