ՌԴ փոխվարչապետ Ալեքսեյ Օվերչուկը հայտարարել է, որ Ռուսաստանի և Հայաստանի միջև ապրանքաշրջանառությունը 2026 թվականին կտրուկ նվազել է 2025-ի համեմատ և, նրա գնահատմամբ, շարունակելու է կրճատվել։
Նրա խոսքով՝ 2026-ին, նախորդ տարվա համեմատ, այդ ցուցանիշը նվազել է մոտ երկու երրորդով և կշարունակի կրճատվել, հայտնում է ՏԱՍՍ-ը:
«Այն իրավիճակը, որը ձևավորվել է ԵԱՏՄ-ի և Հայաստանի հարաբերություններում, կանխատեսելի էր։ Վերջին 3-4 տարիների ընթացքում մենք մեր գործընկերներին Հայաստանում ասել ենք, որ նման ռիսկեր կան, մասնավորապես՝ ապրանքաշրջանառության կրճատման ռիսկերը»,– նշել է Ռուսաստանի կառավարության փոխնախագահը։
Օվերչուկի խոսքով՝ 2024 թվականին Ռուսաստանի և Հայաստանի միջև ապրանքաշրջանառությունը հասել էր ռեկորդային՝ մոտ 12 միլիարդ դոլարի։ Նրա տվյալներով՝ 2025-ին այն նվազել է մինչև մոտ 8 միլիարդ դոլար, իսկ 2026-ին արձանագրվել է կտրուկ անկում՝ մոտ երկու երրորդով՝ նախորդ տարվա համեմատ։
Նա հավելել է, որ առկա իրավիճակից ելնելով՝ ակնհայտ է, որ ապրանքաշրջանառությունը կշարունակի նվազել։
