Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանը լրագրողների հետ զրույցում շեշտել է, որ Հայ Առաքելական սուրբ եկեղեցին 1700 տարվա պատմություն ունեցող և ամբողջ աշխարհում տարածված կառույց է, այլ ոչ պարզապես տեղական կազմակերպություն։
«Եկեղեցին մեր ազգի հոգին է, մարմինը պետությունն է ու ժողովուրդը, իսկ հոգին՝ եկեղեցին։ Եկեղեցին ոչ ՀԷՑ է, ոչ էլ «Վելնես» կենտրոն, որ կարելի լինի բոլշևիկյան ձևով «կուլակաթափ» անել, պետականացնել կամ իրենց կառավարիչը նշանակել»,- հայտարարել է արքեպիսկոպոսը, հայտնում է Factor.am-ը:
Պատասխանելով հարցին, թե կաթողիկոսը չէր կարող արդյոք ներկայանալ ԱԺ-ի առաջին նիստին առանց հրավերի, Նաթան սրբազանն այսպես է հակադարձել․ «Նենց եք խոսում, ոնց որ Կաթողիկոսը ձեր թաղի տղերքից մեկն ա ու իրա գործը չի անում․ այդպես չի, էլի»։
Նա նաև ընդգծել է, որ ինքն իրեն հարգող յուրաքանչյուր անձ առանց պաշտոնական հրավերի որևէ վայր չի այցելում, առավել ևս, երբ խոսքը Ամենայն Հայոց կաթողիկոսի մասին է։
Մայր Աթոռի ներկայացուցիչը պատասխանել է նաև եկեղեցու և օտարերկրյա հատուկ ծառայությունների հնարավոր կապերի վերաբերյալ հնչող պնդումներին։
«Ի՞նչ է նշանակում եկեղեցին կապ ունի ՖՍԲ-ի հետ, ինչո՞ւ, օրինակ, ոչ ЦРУ-ի, ինչո՞ւ ոչ MI6-ի: Գաղտնիք չէ, ես Մեծ Բրիտանիայի քաղաքացի եմ, է ինչո՞ւ ինձ չեն որակավորում որպես MI6-ի ագենտ։ Ես նույն հարցը տվել եմ այստեղի իմ դեսպանին ու հյուպատոսին»,- ընդգծել է Նաթան սրբազանը՝ նման մեղադրանքներն ուղղակի անհեթեթ որակելով։
Նա, միաժամանակ, հավելել է․ «Եթե Հայաստանը եղել է Ռուսաստանի տիրապետության տակ, ուրեմն այսօրվա գործող իշխանություններն են դրա մնացորդները»։
Անդրադառնալով նաև այն շահարկումներին, որոնց համաձայն՝ Վեհարանում գործարար և բարերար Սամվել Կարապետյանի լուսանկարն է փակցված, Նաթան սրբազանը պարզաբանել է, որ Վեհարանի ամբողջական վերանորոգումն ու կահավորումն իրականացվել են Սամվել Կարապետյանի բարեգործության շնորհիվ։
«Մենք ամեն տեղ մեր բարերարների նկատմամբ հարգանք ու երախտագիտություն ունենք․ գնացեք Մատենադարան՝ Վաչե և Թամար Մանուկյանների նկարները կան, այլ բարերարների նկարներ կան։ Դա երախտագիտություն է, այլ ոչ թե ուրիշ բան»,- եզրափակել է սրբազանը։
