Օգոստոսի 14-ից Կիևյան կամրջով երթևեկությունը կվերականգնվի և կամրջի հարակից ճանապարհահատվածներում կգործեն երթևեկության կազմակերպման նախկին կարգավորումները, հայտնում է Երևանի քաղաքապետարանը:
Կամրջի հիմնանորոգման շրջանակում կատարված բոլոր աշխատանքների հիմնական նպատակն է եղել բարձրացնել երթևեկության անվտանգությունը և քաղաքացիների համար ապահովել առավել անվտանգ ու հարմարավետ պայմաններ։
Աշխատանքների ընթացքում արդեն տեղադրվել է ասֆալտբետոնե վերին շերտը, ասֆալտապատվել են կամրջի երկու կողմերի մայթերը, տեղադրվել են նոր ցինկապատ արգելափակոցներ։ Վերականգնվել և ներդրվել են ջրահեռացման ու ջրամեկուսացման համակարգերը, վերականգնվել են դեֆորմացիոն կարերը, իսկ լուսավորության սյուների էլեկտրական մալուխներն ապամոնտաժվել և տեղափոխվել են մայթի տակ տեղակայված դիտահորեր։
Երթևեկելի հատվածը բացելուց հետո կամրջի հիմնանորոգման մնացած աշխատանքները շարունակվելու են։
Նախատեսվում է իրականացնել հենարանների վնասված հատվածների մաքրում, քայքայված ամրանների մշակում, կամարային հատվածի վերականգնում, ինչպես նաև այլ անհրաժեշտ աշխատանքներ։
Դեֆորմացիոն կարերի հատվածում կիրառվել է հատուկ պոլիմեր-բետոնային նյութ, որը Հայաստանում առաջին անգամ է օգտագործվել։ Այն նախատեսված է տրանսպորտային միջոցների անցնելու ժամանակ առաջացող հարվածներն ու տատանումները հնարավորինս նվազեցնելու, կամրջի անվտանգ շահագործումն ապահովելու և երթևեկությունն առավել հարմարավետ դարձնելու համար։
