Խորհրդարանական ընդդիմադիր ամենամեծ ուժը՝ «Ուժեղ Հայաստանը», հոկտեմբերին նախատեսված համայնքային ընտրություններին մասնակցության հայտ է ներկայացրել միայն Ստեփանավանում։
Հոկտեմբերի 25-ին Հայաստանի տասը մարզի 19 համայնքներում ընտրություններ են նախատեսվել։ Նիկոլ Փաշինյանի իշխանության դեմ պայքարող՝ Սամվել Կարապետյանի գլխավորած ուժը մնացած 18 համայնքներում թեկնածուներ չի առաջադրել, հայտնում է «Ազատությունը»:
Ստեփանավանում «Ուժեղ Հայաստանի» ընտրական ցուցակը գլխավորելու է Արսեն Գևորգյանը։ Այստեղ իշխող ՔՊ-ի թեկնածուն Ստեփանավանին միավորվող Լոռի բերդի համայնքապետ Արայիկ Ներսիսյանն է։
Խորհրդարանական երկրորդ ընդդիմադիր ուժի՝ «Հայաստան» դաշինքում ընդգրկված կուսակցությունները որոշել են տեղական ընտրություններին մասնակցել առանձին։ ՀՅԴ-ն առաջադրվել է խոշորացված Մարտունի, Արտաշատ, Հրազդան համայնքներում և Ծաղկաձորում, իսկ դաշինքի մաս կազմող «Առաջ» կուսակցությունը՝ միայն Արմավիրի մարզի Արաքս համայնքում։
ՀՅԴ-ից ավելի վաղ հայտնել էին, որ պատրաստվում են պայքարել նաև Գորիսում, սակայն ի վերջո որոշել են այնտեղ չառաջադրվել։ Այս համայնքում իշխող ուժի թեկնածուն նախկին ընդդիմադիր համայնքապետ Առուշ Առուշանյանն է:
Համայնքային ընտրություններին ընդդիմադիր ուժերից ակտիվ մասնակցություն է ցուցաբերել Մանե Թանդիլյանի ղեկավարած արտախորհրդարանական «Ապրելու երկիր» կուսակցությունը։ Այն ընտրապայքարի է մասնակցելու Մեղրիում, Գորիսում, Ջերմուկում, Դիլիջանում, Մարտունիում ու Արթիկում։ «Ապրելու երկիրը» նախորդ ընտրություններում Փարաքարում և Նոյեմբերյանում հաղթել էր իշխող ՔՊ-ին։
Կալանավորված Գագիկ Ծառուկյանի «Բարգավաճ Հայաստան» կուսակցությունը դեռևս որևէ հայտարարություն չի արել։ Հայտնի չէ՝ կուսակցությունը որևէ համայնքում թեկնածու առաջադրել է, թե ոչ։
