ՀՀԿ-ական նախկին պատգամավոր Աշոտ Արսենյանին և որդուն՝ ՔՊ-ական Վահագն Արսենյանին պատկանող «Ջերմուկ Գրուպ» ՓԲԸ-ն կստանա 270.7 մլն դրամի մաքսատուրքից ազատման արտոնություն։ Հարցն ընդգրկվել է կառավարության սեպտեմբերի 24-ի նիստի չզեկուցվող հարցերի ցանկում, հայտնում է Aysor.am-ը:
Արսենյանի որդին՝ Վահագն Արսենյանը, 2021 թվականին «Քաղաքացիական պայմանագիր» կուսակցության ցուցակով ընտրվել է Ջերմուկ համայնքի ղեկավար, իսկ այժմ զբաղեցնում է Վայոց Ձորի մարզպետի պաշտոնը։
Կառավարության ներկայացրած հիմնավորման համաձայն՝ ընկերությունը նախատեսում է ներմուծել 215 մլն դրամ արժողությամբ սարքավորումներ, ինչպես նաև 656․9 մլն դրամի հումքի լրացուցիչ խմբաքանակ։ Նախատեսված լրացումների արդյունքում ապրանքների ընդհանուր արժեքը հասնելու է 4․3 մլրդ դրամի։ Ընդհանուր արժեքի համար մաքսատուրքից ազատման արտոնությունը գնահատվում է 270․7 մլն դրամ։
Հիմնավորման մեջ նաև արձանագրվել է, որ արտոնության տրամադրումը լուրջ խթան կհանդիսանա նոր ներդրումային ծրագրերի իրականացման համար, ինչի հետևանքով ակնկալվում է նոր աշխատատեղերի ստեղծում, ներդրումների ներգրավում, ինչպես նաև տեղական արտադրության և արտահանման խթանում։
