Ժամանակավորապես փակվել են Բերդ համայնքի նախկին ղեկավար Հարություն Մանուչարյանի ընտանիքին պատկանող գազալցակայանները։ Այս մասին գրել է «Հրապարակ» օրաթերթը։
Քննչական կոմիտեից հայտնել են, որ գազալցակայանները փակվել են առանձնապես խոշոր չափերով հարկեր չվճարելու համար, հայտնում է Factor.am-ը:
«Առանձնապես խոշոր չափերով հարկեր չվճարելու դեպքի առթիվ նախաձեռնված քրեական վարույթի նախաքննության ընթացքում ընկերության հասցեների նկատմամբ կիրառվել են ժամանակավոր սահմանափակումներ՝ քննչական և վարութային գործողություններ իրականացնելու նպատակով»,- նշել են ՔԿ-ից։
Հարություն Մանուչարյանը Տավուշի մարզի Բերդ համայնքը ղեկավարել է 2017-2022 թվականներին։ Մինչ այդ՝ 2012 թվականից, նա զբաղեցրել է Բերդ քաղաքի քաղաքապետի պաշտոնը։
2022 թվականի սեպտեմբերին անցկացված ՏԻՄ ընտրություններում Մանուչարյանի գլխավորած «Զորավոր համայնք» դաշինքը հաղթանակ է տարել։ Սակայն նույն տարվա հոկտեմբերին Մանուչարյանը հայտարարել է ավագանու մանդատից հրաժարվելու մասին։
2021-2022 թվականներից սկսած նա հայտնվել է իրավապահ մարմինների ուշադրության կենտրոնում։ Մանուչարյանին մեղադրանքներ են առաջադրվել պաշտոնեական լիազորությունների չարաշահման, պաշտոնեական կեղծիքի, ինչպես նաև որդու կառուցած ինքնակամ շինությունների օրինականացման հետ կապված ենթադրյալ չարաշահումների համար։
