ՀՀ Սյունիքի մարզի Սիսիան համայնքի Շաքի բնակավայրում ադրբեջանցի զինծառայողի կրակոցից տուժած կինը՝ Անի Ավետիսյանը, ոտքը չի կարողանում շարժել, նրան դեռ ևս մեկ վիրահատություն է սպասվում: Այս մասին ասել է Անիի քույրը՝ Արփի Ավետիսյանը, հայտնում է Sputnik Արմենիան:
Անին այժմ բուժում է ստանում Երևանի «Սուրբ Գրիգոր Լուսավորիչ» ԲԿ-ում:
«Ոտքը երկաթով ֆիքսած է, պետք է կրկին վիրահատություն լինի, բայց դա երևի 1 ամսից: Քույրս դեռ չի տեղաշարժվում, անընդհատ ցավեր է ունենում, բժիշկները ցավազրկողներ են ներարկում: Այդ ոտքն ընդհանրապես չի կարողանում շարժել»,- նշել է Արփին:
Քույրը հայտնել է, որ Անիի կրտսեր որդու ձեռքի կոտրված մատների հատվածում երկաթներ էին դրել, բայց դրանք հանել են ու գիպս դրել:
Արփին ընդգծել է, որ քրոջ երեխաներն այժմ Երևանում են, իրենց տատիկի և պապիկի տանը, ամեն օր իրենց մորը տեսակցում են հիվանդանոցում: Արփին նաև նշել է, որ Անին հուզական ծանր վիճակում է:
Հոկտեմբերի 10-ին համացանցում բժիշկ Անդրանիկ Ղազարյանն ադրբեջանցի զինծառայողի կրակոցից վիրավորում ստացած Անի Ավետիսյանի և նրա որդու հիվանդանոցային լուսանկարն է հրապարակել:
