Բաքվում բնակվող ադրբեջանցի ակտիվիստ և արվեստագետ Իլքին Հուսեյնովի հետ կապը կտրվել է այն բանից հետո, երբ նա նախաձեռնել է հիջաբի արգելքի դեմ բողոքի պատճառով դպրոց չհաճախող երեխաների կրթությանն աջակցող ծրագիր։
Հուսեյնովի գտնվելու վայրն անհայտ է նախորդ օրվանից՝ «Թող Լեյլին դպրոց գնա» նախաձեռնության ստեղծումից կարճ ժամանակ անց։ Ծրագրի նպատակն է եղել լրացուցիչ ուսուցում կազմակերպել այն աշակերտների համար, որոնք դպրոցներում հիջաբ կրելու արգելքի դեմ բողոքի շրջանակում հրաժարվել են հաճախել դասերին։ Առայժմ պարզ չէ՝ արդյոք որևէ աշակերտ հասցրել է օգտվել նախաձեռնության առաջարկած կրթական հնարավորություններից, հայտնում է OC Media-ն:
Հոկտեմբերի 15-ի առավոտյան նախաձեռնության պաշտոնական կայքն ու Instagram-ի էջն արդեն անհասանելի էին։
Մեկ այլ ակտիվիստ՝ Ջավիդ Աղան, X սոցիալական հարթակում հայտնել է, որ մոտավորապես ժամը 16։00-ին անհայտ անձինք այցելել են Հուսեյնովի՝ Իզզաթ Նաբիևի փողոցում գտնվող բնակարան։ Ակտիվիստը նրանց հետ դուրս է եկել տնից, ինչից հետո նրա հետ կապ հաստատել չի հաջողվել։ Հաղորդումների համաձայն՝ այդ պահից նրա հեռախոսն անջատված է, իսկ գտնվելու վայրի մասին որևէ տեղեկություն չկա։
Աղան նաև ուշադրություն է հրավիրել այն հանգամանքի վրա, որ Facebook Messenger-ից ծանուցում է ստացել Հուսեյնովի օգտահաշվին նոր սարք միացնելու վերաբերյալ։
«Ես նրան հաղորդագրություն էի ուղարկել Facebook Messenger-ով, և քիչ առաջ տեսա ծանուցումը՝ «Հուսեյնով Իլքինը նոր սարք է ավելացրել այս խոսակցությանը»։
«Կարծես թե նրա օգտահաշիվը կարող էր կոտրված լինել։ Մենք անհանգստացած ենք Իլքինի համար»,– գրել է ակտիվիստը։
Մինչ այժմ պաշտոնական աղբյուրները որևէ տեղեկություն չեն հրապարակել, որը կհաստատեր Հուսեյնովի ձերբակալության կամ կալանավորման փաստը։
Ջավիդ Աղայի փոխանցմամբ՝ Հուսեյնովը կապված է «Թող Լեյլին դպրոց գնա» նախաձեռնության հետ, որը, ըստ առկա տեղեկությունների, ստեղծվել է այս շաբաթվա սկզբին՝ Ադրբեջանի դպրոցներում հիջաբ կրելու նկատմամբ կիրառված վերջին սահմանափակումներից հետո։
Նախաձեռնության հեղինակները նպատակ են ունեցել ստեղծել կրթական հարթակ, որի միջոցով ուսուցիչները կարող էին դասեր անցկացնել հիջաբի արգելքի հետևանքով դպրոց չհաճախող աշակերտների համար։ Այդպիսով նախատեսվել է ապահովել երեխաների կրթության շարունակականությունը և թույլ չտալ, որ նրանք զրկվեն ուսում ստանալու հնարավորությունից։
Ծրագիրը կարճ ժամանակով գործարկել է նաև Instagram-ի էջ՝ «qoymektebegetsin» օգտանունով, որը ներկայում, ըստ երևույթին, հեռացվել է։
«Ես կասկածում եմ, որ նրան ձերբակալել են, և կարծում եմ՝ պատճառը հենց սա է»,– հայտարարել է Ջավիդ Աղան։
Այս պահին շարունակում է անհայտ մնալ՝ արդյոք Հուսեյնովին բերման են ենթարկել կամ ձերբակալել իրավապահ մարմինների ներկայացուցիչները։ Պաշտոնական հաստատում չի ստացվել ո՛չ նրա գտնվելու վայրի, ո՛չ էլ բնակարան այցելած անհայտ անձանց ինքնության վերաբերյալ։
