Սանկտ Պետերբուրգում կապիկի ծաղիկով վարակման 5 դեպք լաբորատոր հաստատում է ստացել։ Հիվանդության կասկածանքով հոսպիտալացված բոլոր պացիենտները բուժում են ստանում Ս. Պ. Բոտկինի անվան կլինիկական ինֆեկցիոն հիվանդանոցում։
«Հիվանդները շարունակում են բուժումը, նրանց վիճակը կայուն է, միջին և թեթև ծանրության»,-հայտնել են բուժհաստատությունից, գրում է ՌԲԿ-ն:
Հոկտեմբերի 16-ին «Ռոսպոտրեբնադզորի» Սանկտ Պետերբուրգի և Լենինգրադի մարզի միջտարածաշրջանային վարչությունը տեղեկացրել է կապիկի ծաղիկով հնարավոր վարակման կասկածանքով հինգ անձի բժշկական հսկողության տակ վերցնելու մասին։ Միաժամանակ մասնագետները սկսել են համաճարակաբանական հետազոտություն՝ վարակվածների հետ շփում ունեցած մարդկանց շրջանակը պարզելու նպատակով։
Կապիկի ծաղիկը, որը միջազգային անվանումով հայտնի է նաև որպես mpox, վարակիչ հիվանդություն է, որի հարուցիչը MPXV վիրուսն է։ Վարակը կարող է փոխանցվել հիվանդ մարդու հետ սերտ ֆիզիկական շփման ընթացքում, այդ թվում՝ հպումների, համբույրների և սեռական հարաբերությունների միջոցով։ Փոխանցման հնարավոր ուղիներից են նաև վարակված անձի օգտագործած հագուստի, անկողնային պարագաների և այլ աղտոտված իրերի հետ շփումները։ Վարակվելու վտանգ կա նաև վիրուսակիր կենդանիների հետ անմիջական շփման դեպքում։
Հիվանդության առաջին ախտանշանները կարող են ի հայտ գալ վարակվելուց հետո 1-ից 21 օրվա ընթացքում։ Առավել բնորոշ դրսևորումներից են ցավոտ մաշկային ցանը, մարմնի ջերմաստիճանի բարձրացումը, ավշային հանգույցների մեծացումը, գլխացավը, մկանային ցավերը և արտահայտված թուլությունը։ Որոշ դեպքերում հիվանդությունը կարող է ծանր ընթացք ունենալ և հանգեցնել առողջության համար վտանգավոր բարդությունների։
Ավելի վաղ՝ հոկտեմբերի 15-ին, Մոսկվայի մարզում կանխարգելիչ նպատակներով հոսպիտալացվել էր ևս հինգ մարդ։ Նրանք շփում են ունեցել անձի հետ, որի մոտ կասկածվել է կապիկի ծաղիկով վարակում։ Առողջապահության նախարարությունից պարզաբանել են, որ հոսպիտալացվածների մոտ հիվանդությանը բնորոշ ախտանշաններ չեն արձանագրվել, իսկ նրանց ընդհանուր վիճակը գնահատվել է բավարար։ Այդուհանդերձ, բոլոր հինգ անձանցից վերցվել են անհրաժեշտ լաբորատոր նմուշներ, և նրանց նկատմամբ սահմանվել է բժշկական հսկողություն։
Ռուսաստանում կապիկի ծաղիկով վարակման դեպքեր են հայտնաբերվել նաև այս տարվա փետրվարին։ Ամսվա սկզբին հիվանդությունը հաստատվել էր Դոմոդեդովոյի հիվանդանոց տեղափոխված պացիենտներից մեկի մոտ։ Հետագայում նույն բուժհաստատություն է հոսպիտալացվել նաև նրա հետ շփում ունեցած մեկ այլ անձ։
Փետրվարի 15-ին Սանկտ Պետերբուրգում վարակը հայտնաբերվել է երկու տղամարդու մոտ, որոնք վերադարձել էին Թաիլանդից։ Նրանց նույնպես տեղափոխել էին Բոտկինի անվան ինֆեկցիոն հիվանդանոց՝ համապատասխան բուժում ստանալու նպատակով։
