Ամերիաբանկի գլխամասային շենքի կառուցման նպատակով հայտարարված մրցույթում ներկայացված նախագծերից ոչ մեկը հաղթող չի ճանաչվել, քանի որ նախագծերը ներդաշնակ չեն Երևանի Շահումյան հրապարակի պատմական միջավայրին քաղաքաշինական, ճարտարապետական և գեղարվեստական արժանիքների պահպանման տեսանկյունից: Ինչպես հաղորդում է ՀՀ Մշակույթի նախարարության պաշտոնական կայքը, նախարարության կողմից հանձնաժողովին առաջարկել է հստակեցնել մրցույթի պայմանները և կատարել համապատասխան փոփոխություն` կարևորելով շենքի ներդաշնակությունը պատմականորեն ձևավորված քաղաքաշինական միջավայրի հետ, հուշարձան-շենքերի և նախատեսվող շենքերի միջև, ճարտարապետագեղարվեստական լուծման ինքնատիպությունը և այլն:
Հանձանաժողովը չափորոշիչների առաջին երեք կետերի գործակիցը սահմանել է կրկնակի բարձր` քան մյուս երկուսինը: Քննարկման արդյունքում հանձնաժողովը հաղթող չի ճանաչել նախագծերից ոչ մեկը, իսկ երկրորդ տեղը տրվել է այն նախագծին, որը առավելագույնս է լուծել հուշարձանի և պատմական միջավայրի պահպանման խնդիրները:
Մրցույթը հայտարարվել էր 2010 թ.-ի դեկտեմբերի 15-ին` Վ. Սարգսյան փող. 2, 4, 6 և Դեղատան փող. 2 հասցեների միջև ընկած տարածքում` Ամերիաբանկի գլխամասային շենքի կառուցման համար: Նշված հասցեներում գտնվող շենքերը պատկանում են ցարական շրջանի կառույցների թվին և ընդգրկված են ՀՀ պատմության և մշակույթի անշարժ հուշարձանների պահպանության պետական ցուցակում:
