Վաղը Երևանի պետհամալսարանի կենտրոնական մասնաշենքում Հայաստանի երիտասարդական հիմնադրամի և ԵՊՀ ուսանողական խորհրդի նախաձեռնությամբ կմեկնարկի «ԵՊՀ-ն ընդդեմ ծխախոտի և թմրամիջոցների» ծրագիրը։ Ծրագիրը կիրականացվի ԵՊՀ ողջ տարածքում մինչև 2011թ. դեկտեմբեր ամիսը։
Հայաստանի Երիտասարդական հիմնադրամից հայտնում են, որ «ԵՊՀ-ն ընդդեմ ծխախոտի և թմրամիջոցների» խորագրով ծրագրի շրջանակներում կստեղծվեն տեղեկատվական նյութեր՝ պաստառներ և բուկլետներ։ Պաստառները կփակցվեն ԵՊՀ լսարաններում, գրադարանի ընթերցասրահներում, ինչպես նաև միջանցքների տեսանելի վայրերում, իսկ բուկլետները կտարածվեն ուսանողության շրջանում:
ԵՊՀ յուրաքանչյուր ֆակուլտետում կանցկացվեն ավելի քան 25 սեմինար-քննարկումներ՝ նվիրված ծխախոտի և թմրանյութերի վնասակար ազդեցությանը։ Կկազմակերպվեն նաև թեմատիկ կինոդիտումներ: Իրականացվող միջոցառումները ԵՊՀ տարածքում կստեղծեն բարենպաստ բարոյահոգեբանական մթնոլորտ ծխախոտի և թմրանյութերի դեմ ակտիվ և արդյունավետ պայքարի համար, համալսարանի ուսանողության և դասախոսական անձնակազմի շրջանում կբարձրանա ծխախոտի և թմրադեղերի դեմ պայքարելու անհրաժեշտության գաղափարը, ինչպես նաև ուսանողությանը կներկայացվեն ծխախոտի և թմրանյութերի օգտագործման հետևանքները:
