Մի շարք պետություններ, ինչպիսիք են Քաթարն ու Սաուդյան Արաբիան, որոնք օժանդակում են Սիրիայի տարածքում գործող զինված ահաբեկչական խմբավորումներին, կրում են ողջ պատասխանատվությունը սիրիական ժողովրդի դեմ իրագործվող ահաբեկչական հարձակումների համար, հայտնել է Սիրիայի տեղեկատվության նախարար Ադնան Մահմուդը, երեքշաբթի օրը հաղորդել է CAHA սիրիական գործակալությունը: «Որոշ երկրներ, ինչպիսիք են Քաթարն ու Սաուդյան Արաբիան, որոնք գումարներով, զենքով և առանձնահատուկ վերաբերմունքով օժանդակում են զինված ահաբեկչական խմբավորումներին, ողջ սիրիական ժողովրդին որպես թիրախ ընտրած ահաբեկիչների մեղսակիցներն են և պատասխանատվություն են կրում այն բանի համար, որ սիրիական արյուն է թափվում»,- ասել է նախարարը, հաղորդում է ՌԻԱ Նովոստին:
Սիրիայում գրեթե մեկ տարի չեն դադարում հակակառավարական բողոքները, որոնք սկսվել են մարտ ամսին: Սիրիական ընդդիմության ներկայացուցիչների մեծ մասը և Արևմուտքի մի շարք երկրներ պահանջում են նախագահ Բաշար Ասադի հրաժարականը: Այդ պահանջն օժանդակում են ԱՄՆ-ը և ԵՄ երկրները, որոնք մի շարք տնտեսական պատժամիջոցներ են ներմուծել Դամասկոսի հանդեպ: ՄԱԿ-ի տվյալներով, Սիրիայում անկարգությունների զոհերի քանակը գերազանցել է 7,5 հազարը:
