Բոլոր ընդդիմադիր ուժերի համախմբում մի ուժի շուրջ չի լինի, քանի որ կան լիդերներ, ովքեր հազիվ թե համախմբվեն ԲՀԿ առաջնորդ Գագիկ Ծառուկյանի շուրջ: Այսօր մամուլի ասուլիսի ժամանակ նման կարծիք հայտնեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը: Ըստ նրա, Գագիկ Ծառուկյանին ՀԱԿ-ը կսատարի: «Առանձին ՀԱԿ-ի համար դժվար կլինի, իսկ եթե Ծառուկյանը չառաջադրվի, ապա ՀԱԿ-ը ստիպված կլինի առաջադրել Լևոն Տեր- Պետրոսյանին»,- ասաց Ալեքսանդր Իսկանդարյանը: Նա նաև նկատեց, որ ՀԱԿ-ը մայիսի 6-ի խորհրդարանական ընտրություններում հավաքել էր ձայների 7 տոկոսը և այս ընտրություններում անգամ 20 տոկոս հավաքելը դժվար կլինի: ՀՅԴ-ի դիրքորոշումը Ալեքսանդ Իսկանդարյանի համար հասկանալի չէ: «Չի բացառվում, որ այս ուժը չառաջադրի թեկնածու նախագահական ընտրություններում»,- ասաց նա:
Անդրադառնալով այն տեսակետին, թե Ռուսաստանն ու Արևմուտքը կարող են սատարել նախագահի թեկնածուներից որևէ մեկին և դա վճռորոշ կլինի, Ալեքսանդր Իսկանդարյանն ասաց, որ դրան լուրջ չի վերաբերվում: Նա չի կարծում, թե արտաքին ուժերի ուշադրությունը Հայաստանի ընտրությունների հանդեպ այդքան մեծ է: «Ծառուկյանը պայքարում է իր շահերի համար, ոչ թե Ռուսաստանի: Իր շահերի համար է պայքարում նաև Սերժ Սարգսյանը: Մեծ տերությունները կօգնեն այն թեկնածուին, ով կկարողանա ինքն իրեն օգնել: Նրանք կհամագործակցեն այն մարդու հետ, ով կդառնա երկրի նախագահը»,- ասաց քաղաքագետը:
