ՀՀ նախագահի նախկին թեկնածու Րաֆֆի Հովհաննիսյանի դիմումում չորս-հինգ էջը ընդհանուր բնույթի դատողություններ են, թե ինչ է տեղի ունեցել, այնուհետ տառացիորեն Ընտրական օրենսգրքի կամ Սահմանադրության հոդվածներն են արտագրված: Այս մասին Սահմանադրական դատարանում լրագրողների հետ ճեպազրույցում ասաց Տիգրան Մուկուչյանը:
«Այն որոշումը, որը վիճարկվում է, ունի տասնհինգ էջ ծավալ: Նշանակում է՝ եթե տասնհինգ էջանոց որոշում ես վիճարկում, պետք է գոնե մի 10 էջանոց պատճառաբանություններ լինեն»,- ասաց նա: Տիգրան Մուկուչյանը նկատեց, որ դիմումում այս կամ այն օրենքից մեջբերում անելիս պետք է հիմնավորել և ներկայացնել պատճառահետևանքային կապը:
Անդրադառնալով Անդրիաս Ղուկասյանի ներկայացրած աղյուսակներին, նա ասաց, որ դիմող կողմի ներկայացրած աղյուսակենրը վկայում են, որ ԿԸՀ-ն աշխատել է բացարձակ թափանցիկ և հրապարակել է բոլոր տեղեկությունները. «Իսկ այժմ, ընդամենը, այդ տեղեկությունների վրա խիստ կամայական ենթադրություններ են արվում»: Տիգրան Մուկուչյանը շեշետեց, որ թվերի վերաբերյալ դատողությունների համար պետք է լինեն փաստարկված հիմքեր, «որոնց մինչ այս պահը դատարանում չենք հանդիպել»:
