Զարուհի Փոստանջյանը ընտրությունների արդյունքների վերաբերյալ ԿԸՀ որոշումը վիճարկող գործի քննության շրջանակներում միջնորդություն ներկայացրեց Սահմանադրական դատարանին՝ Սերժ Սարգսյանին որպես վկա հրավիրել դատարան: «Կազմակերպիչ լինելու հանգամանքը դատարանում պարտավոր ենք պարզել: Պարզաբանություններ պետք է ստանալ նրա հաայտարարությունների հետ կապված, որոնք իրենց մեջ պարունակում եմ զինամթերքի, բռնության և ապագա վտանգների մասին հաղորդում»,- ասաց Զարուհի Փոստանջյանը:
«Առարկում եմ միջնորդության դեմ»,- ասաց Սերժ Սարգսյանի ներկայացուցիչ Դավիթ Հարությունյանը և ավելացրեց, որ դատարանը հետաքրքրությունը բավարարելու տեղ չէ: «Դատարանի լիբերալ լինելն է պատճառը, որ դիմող կողմերը նման միջնորդություններ են ներկայացնում: Ես ընտրությունների կազմակերպման հետ կապված պարզաբանեցի»,- ասաց նա: «Տպավորություն է, որ Սերժ Թանկյանին էլ ենք որպես վկա հրավիրելու»,- ասաց ՍԴ նախագահ Գագիկ Հարությունյանը: Զարուհի Փոստանջյանը մեկ այլ միջնորդություն ներկայացրեց՝ ՍԴ բերել 1988 պարկերը և բոլորի ներկայությամբ պարզելու դրանց պարունակությունը: «Մեր դիմումները, որ միակ միջոցն էր, չեն բավարարվել: Բոլոր պատասխանատուներն ուղղակի անգործություն են դրսևորել»,- ասաց նա:
ՍԴ անդամ Ֆելիքս Թոխյանը հարցրեց. «Ինչպե՞ս եք պատկերացնում՝ երկու օր է մնացել որոշում կայացնելու համար, ինչպե՞ս պետք է կազմակերպենք ձեր միջնորդությունը: 1988 պարկ, ինչպե՞ս եք պատկերացնում, որ նույնիսկ մեծ ցանկության դեպքում բավարարենք»: «Կարող են ուղղակի Սահմանադրությունն անիմիջապես կիրառելով, երկարացնել ժամկետը, և ընդամենը երեք օրում բացել պարկերը և պարզել, թե ինչ էր խփում Սերժ Սարգսյանը: Ցանկության դեպքում կարելի է ուղղակի կիրառել Սահմանադրությունը»,- պատասխանեց Զարուհի Փոստանջյանը:
«Այսիքնքն խախտելով Սահմանադրությունը կիրառե՞լ Սահմանդրություն»,- արձագանքեց Ֆելիքս Թոխյանը: ԿԸՀ նախագահ Տիգրան Մուկուչյանն իր հերթին հայտարարեց, որ առաջարկում են մերժել միջնորդությունը: «Օրվա հետ կապված պարզաբանումը տրվեց: Իրենք ունեցել են լիակատար հնարավորություն լիարժեք վերահսկողություն իրականացնելու՝ վերահաշվարկի, անվավերության դիմումների միջոցով»,- ասաց նա: Նշենք, որ դիմող կողմը մի շարք միջնորդություններ է ներկայացրել, այդ թվում դատարան այլ վկաներ հրավիրելու մասին:
