Շուշիի առանձնակի գումարտակի հրամանատար, «Սարդարապատ» շարժման անդամ Ժիրայր Սեֆիլյանը Ազատության հրապարակում քաղաքացիական խորհրդի ժամանակ ներկայացրեց ապագա Հայաստանի վերաբերյալ իր տեսակետները: Նա նշեց, որ իրենք ունեն հստակ ծրագիր, թե ինչ ուղղությամբ պետք է տանել ժողովրդի պոռթկումը: Նա նկատեց, որ այսօրվա շարժումը խնդիր է դրել նոր որակի հայկական պետություն ստեղծել: «Մեր նպատակը սոսկ իշխանափոխությունը չէ, մեր գլխավոր նպատակը համակարգային փոփոխություններ անելն է, այսօրվանից պետք է հստակեցնենք, թե գործող համակարգին ինչով ենք փոխարինում: Վերջին ժամանակներս բազմիցս լսել ենք, թե Րաֆֆի Հովհաննիսյանը թիմ չունի: Մենք ավելի վաղ էլ ենք ասել, նրա թիմը ամբողջ ժողովուրդն է: Մենք գտել ենք մեխանիզմը, որ կհամախբի նոր պետության ստեղծման գաղափարի շուրջ»,- հայտարարեց նա:
Ժիրայր Սեֆիլյանն ասաց, որ, ըստ իրենց ծրագրի, նոր պետությունը ստեղծվելու է ոչ միայն հայաստանաբնակ ժողովրդի, այլ ամբողջ հայության ներուժով:
Ըստ նրա` եկել է քաղաքական սերնդափոխության ժամանակը. «25 տարվա ցիկլ ենք անցել, մենք նկատի չունենք տարիքը, այլ որակական փոփոխությունը: Ի տարբերություն նախորդ սերնդի, որին հարգում ենք, այսօր եկել է իրերն իրենց անունով կոչելու նոր քաղաքական սերունդը: Նախորդի նման ստրկամիտ չի լինելու, պետք է դուրս գալ այդ որակից»,- ասաց Ժիրայր Սեֆիլյանը:
Նա նկատեց, որ շարժման ընթացքում կոլեգիալ որոշումներ կայացնելու մշակույթ պետք է արմատավորել: «Բոլորս ծանոթ ենք պատմությունից, որ հեղափոխությունները մտահղանում են հանճարները, իրականացնում են ռոմանտիկները, ղեկին հայտնվում են տականքները: Ո՞րն է այն մեխանիզմը, որ այս անգամ դա թույլ չի տալու: «Մենք ունենք այդ ծրագիրը: Մեր այս ամբողջ պայքարի ընթացքում մենք գտել ենք ուղի, որը գործելու է օրենքի և սահմանադրության շրջանակներում: Ի տարբերություն նախորդի` այն դեպի փոկուղի չի տանելու»,- հայտարարեց նա: Ժիրայր Սեֆիլյանը նկատեց, որ փետրվարի 18-ին ժողովուրդը միայն իր երկրի նախագահին չի ընտրել. «Միաժամանակ հրամայել է, որ օր առաջ բոլորս կարողանանք իրավականորեն ամրագրել իր այդ որոշումը»:
