Արգենտինահայ գործարար Էդուարդո Էռնեքյանի հարկային խնդիրներն իր երկրում ոչ մի կերպ չեն անդրադառնա Երեւանի օդանավակայանի հավատարմագրային կառավարման շուրջ պայմանագրով ամրագրված նրա ստանձնած պարտավորությունների կատարման ընթացքի վրա: Այդ մասին «Արմինֆո» գործակալություանն են հայտարարել Հայաստանի արդարադատության նախարարության մամլո ծառայությունում` մեկնաբանելով հարկերի չվճարման համար Արգենտինայի հարկային մարմինների կողմից Էռնեկյանին ներկայացված մեղադրանքի վերաբերյալ տեղեկատվությունը: Նշենք, որ 2001 թվականի հոկտեմբերին Հայաստանի կառավարության հետ կնքված պայմանագրի համաձայն, Էռնեքյանի «Կորպորասիոն Ամերիքան» ֆիրման 30 տարի ժամկետով հավատարմագրային կառավարման է ընդունել «Զվարթնոց» օդանավակայանը: Մինչդեռ, «Արմինֆո»-ի տվյալներով, Արգենտինայի կառավարության հետ Էռնեկյանի հարկային խնդիրների առկայությունը ընկալվել է ոչ միանշանակ: Որոշ դիտորդների կարծիքով, 5 մլն դոլարն (իբր հարկային մարմիններից թաքցրած) այնքան աննշան գումար է գործարարի հիմնական ընկերության` «Արգենտինայի օդանավակայանների» շրջանառության մեջ, որ դրա հնարավոր վճարումը դժվար թե անդրադառնա Հայաստանի կառավարության հանդեպ պարտավորությունների կատարմնան վրա: Մյուսները գտնում են, որ Հայաստանի կառավարությունը պետք է ավելի զգուշորեն մոտենա ներդնողների ընտրության հարցին, այլապես, Էռնեքյանի նման դեպքերը կարող են բացասաբար անդրադառնալ երկրի գործարար հեղինակության վրա:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
