«Սյունիքի մարզի Ներքին Գոտեձոր տեղանքում պեղումների ժամանակ հայտնաբերվել են դրոշմավորված կենցաղային առարկաներ, որոնք վկայում են այդ դարաշրջանում առկա բարդ սոցիալական հարաբերությունների մասին»,-ասել է ՀՀ ԳԱԱ հնագիտության ինստիտուտի տնօրենը Պավել Ավետիսյանը սեպտեմբերի 3-ին տեղի ունեցած մամլո ասուլիսում:
Ըստ նրա, պեղումների ժամանակ հայտնաբերվել են նաև խոշոր եղջերավորների (հիմնականում ցլերի) ոսկորներ, ինչպես նաև աշխատանքային գործիքներ, պատրաստված Սյունիքի օբսիդիանից: Հայտնաբերվել են նաև գունավոր խեցեղեն իրեր, որոնք, ենթադրաբար, դրսից են բերվել: Պավել Ավետիսյանը նաև ուշադրությունը հրավիրել է այն հանգամանքի վրա, որ Ներքին Գոտեձորում հայտնաբերված կենցաղային իրերը նման են Ուրմիա լճի շրջանում հայտնաբերված իրերին:
Պեղումները Ներքին Գոտեձորում Հայաստանի և Ֆրանսիայի գիտության ազգային կենտրոնի մասնագետները համատեղ սկսել են 2009-ին: Նախագիծը ֆինանսավորում են երկու երկրները:
«Պեղումները Ներքին Գոտեձորում մեծ հետաքրքրություն են ներկայացնում ոչ միայն Հայաստանի, այլ նաև ողջ Առաջավոր Ասիայի համար: Նման գտածոներ ունենալով մենք ցանկացած պահի կարող ենք հակահարված տալ հարևան երկրների երբեմն անհեթեթության հասնող պնդումներին»,-ասել է ՀՀ ԳԱԱ հնագիտության ինստիտուտի տնօրենը:
