2011 թ. մարտի 1-ին Հայաստանի Լոռու մարզի ընդհանուր իրավասության դատարանում տեղի կունենա դատական նիստ` Լեռնապատ համայնքի գյուղապետ Վանո Եղիազարյանն ընդդեմ Գևորգ Մելքոնյանի:
Լոռու մարզի Լեռնապատ գյուղի բնակիչները բաց նամակ են ուղարկել Հայաստանի Հանրապետության նախագահ Սերժ Սարգսյանին, վարչապետ Տիգրան Սարգսյանին, գլխավոր դատախազ Աղվան Հովսեփյանին Լեռնապատ գյուղի գյուղապետ Վանո Եղիազարյանի անօրինականությունների, չարաշահումների, յուրացումների և բազմաթիվ այլ անօրինականությունների վերաբերյալ:
2010 թ. սեպտեմբերի 1-ին գյուղապետի կողմից թույլ տրված անօրինականությունների մասին նաև հոդված է տպագրվել «Ժամանակ» օրաթերթում:
Գյուղապետ Վանո Եղիազարյանը դատի է տվել համագյուղացի Գևորգ Մելքոնյանին, ով «Ժամանակ» օրաթերթի համարում մի քանի, ըստ գյուղապետի` «վիրավորական» և «զրպարտչական» արտահայտություններ է արել իր հասցեին և լրատվամիջոցով արատավորել իր բարի համբավը, պատիվն ու արժանապատվությունը, հաղորդում է Հելսինկյան քաղաքացիական ասամբլեայի Վանաձորի գրասենյակի մամլո ծառայությունը:
