«Ուժեղ Հայաստան» խմբակցությունը Հաշվեքննիչ պալատի անդամի թափուր պաշտոնի համար ներկայացրել է Տարոն Վարազդատյանի թեկնածությունը։ ԱԺ ֆինանսավարկային և բյուջետային հարցերի մշտական հանձնաժողովի նիստում թեկնածուի կենսագրական տվյալները ներկայացրել է խմբակցության քարտուղար Տիգրան Աբրահամյանը, հայտնում է Panorama.am-ը:
Նույն պաշտոնի համար «Քաղաքացիական պայմանագիր» խմբակցությունն ավելի վաղ առաջադրել է Կարեն Առուստամյանի թեկնածությունը։
Հանձնաժողովի նիստի ընթացքում տեղի է ունեցել երկու թեկնածուների վերաբերյալ քվեարկություն։
Քվեարկության արդյունքներով Կարեն Առուստամյանի թեկնածությունն ստացել է չորս կողմ ձայն։ Նրա թեկնածությանը դեմ քվեարկող պատգամավոր չի եղել։
Տարոն Վարազդատյանի թեկնածության օգտին քվեարկել է երկու պատգամավոր, իսկ երեքը դեմ են արտահայտվել։
Այսպիսով, ԱԺ ֆինանսավարկային և բյուջետային հարցերի մշտական հանձնաժողովը հավանություն է տվել «Քաղաքացիական պայմանագիր» խմբակցության առաջադրած Կարեն Առուստամյանի թեկնածությանը։
