Ռուսաստանի նախագահի մամուլի քարտուղար Դմիտրի Պեսկովը հայտնել է, որ Կրեմլում առայժմ չեն ուսումնասիրել ՀՀ նկատմամբ ԵԱՏՄ պայմանագրի գործողության հնարավոր կասեցման հետևանքների մասին զեկույցը։
Եվրասիական միջկառավարական խորհրդում Ռուսաստանի, Բելառուսի, Ղազախստանի և Ղրղզստանի ներկայացուցիչները ներկայացրել են զեկույց, որում անդրադարձ է կատարվել Հայաստանի նկատմամբ Եվրասիական տնտեսական միության մասին պայմանագրի գործողության կասեցման հնարավոր հետևանքներին։
«Ոչ, չենք ծանոթացել», – ասել է Պեսկովը՝ պատասխանելով այն հարցին, թե արդյոք Կրեմլում արդեն հասցրել են ուսումնասիրել ներկայացված զեկույցը, հայտնում է ՌԻԱ Նովոստին:
Փաստաթուղթը ներկայացվելու է միության անդամ երկրների ղեկավարներին հետագա քննարկման և ուսումնասիրության նպատակով։
Զեկույցում ասվում է, որ ԵԱՏՄ պայմանագիրը Հայաստանի նկատմամբ ժամանակավորապես կասեցնելու համատեղ որոշում կարող է ընդունվել՝ չորս անդամ պետությունների համաձայնեցված գործողությունների միջոցով։Ավելի վաղ տեղեկություններ են հրապարակվել, որ Եվրասիական տնտեսական բարձրագույն խորհրդի առաջիկա նիստը նախատեսված է անցկացնել 2026 թվականի դեկտեմբերին։
