«Ուժեղ Հայաստան» խմբակցության պատգամավոր Դավիթ Ղազինյանն Ազգային ժողովում «Կառավարության գործունեության և կառուցվածքի մասին» օրենքում փոփոխություններ և լրացումներ նախատեսող օրինագծի քննարկման ընթացքում քննադատել է պետական գույքի կառավարման համակարգի և Ջրային կոմիտեի գործունեությունը։ Նա անդրադարձել է նաև «Վեոլիա Ջուր» ընկերության աշխատանքին, հայտնում է Panorama.am-Ը:
«ՏԿԵ նախարարը արագ-արագ ճգնաժամի մասին հաղորդում էր գրում ՀԷՑ-ի հետ կապված, թող վերցնեն Հանրային ծառայությունները կարգավորող մարմնի դիմում-բողոքների ցանկը և կտեսնեն, որ մի քանի անգամ, եթե չասեմ՝ տասնապատիկ ավելի շատ է եղել «Վեոլիա Ջուր» ընկերությունից բողոքները։ Հարց է առաջանում, թե ի՞նչն է ձեր համար խոչընդոտ հանդիսացել, որ մի դիմում էլ չեք գրում Վեոլիայի հետ կապված»,- ասել է Ղազինյանը:
Նա ինքն էլ պատասխանել է, որ դրա «պատճառն այն է, որ պետությունը պետք է ներդրում անի, բայց քանի որ չի կարողանում և համարվում է վատ կառավարիչ, չի անում»:
«Պետգույքի կառավարման և Ջրային կոմիտեն բազմաթիվ անգամ ֆուտբոլի գնդակի պես այս ու այն կողմ են տարել»,-ասել է նա:
Ղազինյանի գնահատմամբ՝ նշված կառույցներն այդ ընթացքում արդյունավետ աշխատանք չեն իրականացրել։ Նա նաև հարցականի տակ է դրել Ջրային կոմիտեն Տարածքային կառավարման և ենթակառուցվածքների նախարարության կազմում պահելու նպատակահարմարությունը՝ մատնանշելով ջրամատակարարման խնդիրների պատճառով բնակիչների դժգոհությունները։
«Կարող ենք ունենալ հիմնավոր կասկած, թե այսքան ժամանակ ինչու է մնացել Տարածքային կառավարման նախարարության կազմում, երբ գյուղացիները ջուր չլինելու պարագայում գնում էին գյուղապետի մոտ, և գեներացնում էին բողոքը, հաշվի առնելով, որ Ջրային կոմիտեն և համայնքապետերն էլ ենթարկվում էին ՏԿԵ նախարարին, դրանք չէին լուծվում»,-ասել է նա:
Ընդդիմադիր պատգամավորը բարձրացրել է նաև Ջրային կոմիտեի ոչ արդյունավետ կառավարման պատասխանատվության հարցը: Նա կարծիք է հայտնել, որ Ջրային կոմիտեն արդյունավետ է գործել միայն այն ժամանակ, երբ գտնվել է գյուղատնտեսության նախարարության համակարգում։
