ԱԺ «Հայաստան» խմբակցության պատգամավոր Գեղամ Մանուկյանը անդրադարձել է վարչապետ Նիկոլ Փաշինյանի՝ նոր Սահմանադրության ընդունման անհրաժեշտության վերաբերյալ ներկայացրած հիմնավորումներին։
Անդրադառնալով վարչապետ Նիկոլ Փաշինյանի այն խոսքերին, որ եթե պարզվի, որ խորհրդարանական ընդդիմությունն իր դիրքորոշմամբ կասեցնում է նոր Սահմանադրության ընդունման հետագա գործընթացը, այդ դեպքում հանրային ճնշում է գեներացվելու ընդդիմության նկատմամբ, ասել է, որ «դա իրականում պետական hեղшշրջման մասին հայտարարություն է», հայտնում է Panorama.am-ը:
«Փաշինյանն ամեն օր, հետագայում իր դեմ հարուցվելիք քրեական գործերին, նոր հոդվածներ է ավելացնում։ Փաշինյանը խոսում է Հայաստանի օրենքների դեմ, որովհետև օրենսդրության համաձայն Ազգային ժողովի պատգամավորների վրա ճնշման միջոցով քվեարկությունը չի կարող լեգիտիմ լինել»,-ասել է պատգամավորը:
Մանուկյանը մեղադրել է վարչապետին հակասական հայտարարություններ անելու մեջ:
«Նիկոլ Փաշինյանի բերանում ճիշտ խոսք չկա, իրարահաջորդ ստախոսությունների մի ամբողջ հավաքածու կարելի է համարել, որովհետև պարբերաբար տարբեր ձևերով է արդարացվել սահմանադրության նոր նախագիծը։ Վերջում եկավ, հասավ մի տեղ, որ Արարատ Միրզոյանն ուղղակի բացահայտ ասաց՝ գիտեք՝ նոր նախագիծը Ադրբեջանի պահանջն է»,- ասել է նա:
