Անթալիայում COP31-ի շրջանակում TRT World հեռուստաալիքին տված հարցազրույցում Հայաստանի վարչապետ Նիկոլ Փաշինյանը դրական է գնահատել Թուրքիայի նախագահ Ռեջեփ Թայիփ Էրդողանի հետ հանդիպումը:
Նա հավելել է, որ հիմա պետք է վերանորոգել երկաթուղին և բացել սահմանները, հայտնում է Factor.am-ը:
«Այսօր մենք շատ դրական հանդիպում ենք ունեցել նախագահ Էրդողանի հետ։ Մեր միջև ձևավորվել է դրական երկխոսություն, և մենք անհամբերությամբ սպասում ենք մեր հարաբերությունների հետագա զարգացմանը։ Հիմա անհրաժեշտ է վերանորոգել մեր երկրների միջև երկաթուղին և բացել սահմանները։ Մենք աշխատում ենք այդ ուղղությամբ»,-ասել է նա:
Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է, որ Անկարան արդեն ավարտել է Հայաստանի հետ ցամաքային սահմանի և երկաթուղային հաղորդակցության վերականգնման համար անհրաժեշտ նախապատրաստական աշխատանքները, սակայն սահմանների բացման համար սպասում է Երևանի և Բաքվի միջև վերջնական համաձայնության ձեռքբերմանը, գրում է Ermenihaber-ը:
Ուրալօղլուի խոսքով՝ Անկարան հաշվի է առնում նաև Բաքվի մտահոգությունները։ Նախարարը հավելել է, որ սահմանների բացումը, իր գնահատմամբ, երկար չի տևի։
