AM
21 Նոյեմբեր 2026 - 11:07 AMT

Արամ Ա-ն Լիբանանի նախագահի հետ հանդիպմանը կարևորել է երկրի կայունությունն ու անվտանգությունը

Մեծի Տանն Կիլիկիո կաթողիկոս Արամ Ա-ն հանդիպել է Լիբանանի նախագահ Ժոզեֆ Աունի հետ՝ վերահաստատելով երկրի անկախության, ինքնիշխանության և տարածքային ամբողջականության պահպանման կարևորությունը։ Վեհափառը շնորհավորել է Աունին Լիբանանի անկախության տոնի կապակցությամբ։

Նախագահի հետ հանդիպման ընթացքում Արամ Ա-ն իր աջակցությունն է հայտնել Ժոզեֆ Աունին՝ բարձր գնահատելով Լիբանանում ազգային համերաշխության ամրապնդման, ներքին խաղաղության պահպանման, տնտեսական զարգացման խթանման, ինչպես նաև երկրի անվտանգության ու կայունության ապահովման ուղղությամբ նրա շարունակական ջանքերը, հայտնում է կաթողիկոսությունը:

Վեհափառ Հայրապետը հատուկ կարևորել է Լիբանանի տարածքային ամբողջականության, պետական ինքնիշխանության և անկախության անխախտ պահպանման անհրաժեշտությունը։ Նա նաև ընդգծել է, որ Իսրայելը պետք է դուրս բերի իր ուժերը Հարավային Լիբանանի բռնագրավված տարածքներից։

Արամ Ա կաթողիկոսը վերահաստատել է Մեծի Տանն Կիլիկիո կաթողիկոսության և աշխարհասփյուռ հայկական համայնքների պատրաստակամությունը՝ աջակցելու Լիբանանի պետականության ամրապնդմանը։

Իր հերթին Լիբանանի Հանրապետության նախագահ, գեներալ Ժոզեֆ Աունը բարձր է գնահատել լիբանանահայ համայնքի նշանակալի ավանդը երկրի հասարակական կյանքում։ Նախագահն ընդգծել է, որ հայ համայնքը Լիբանանի հասարակության անբաժանելի մասն է և իր ակտիվ մասնակցությամբ կարևոր ներդրում ունի պետության զարգացման, առաջընթացի ու բարգավաճման գործում։

Հանդիպման ավարտին Արամ Ա Կաթողիկոսը նախագահ Ժոզեֆ Աունին հրավիրել է մասնակցելու Կաթողիկոսարանի նորակառույց Պեզիքյան համագումարների կենտրոնի պաշտոնական բացման արարողությանը։ Կենտրոնի շինարարական աշխատանքները վերջերս ավարտվել են։

Նախագահի հետ հանդիպումից հետո, Վեհափառ Հայրապետի անունից, Արաբական Միացյալ Էմիրությունների, Քաթարի և շրջակայքի հայոց թեմի առաջնորդ Գերաշնորհ Տ. Մեսրոպ արքեպիսկոպոս Սարգիսյանը արաբերենով հայտարարություն է ներկայացրել լրատվամիջոցների ներկայացուցիչներին։