Մաշտոցի պուրակում ինքնակամ շինությունների ապամոնտաժող բրիգադների մասնակիցները հայտարարություն են տարածել, ըստ որի, իրենք պայքարում են երկրում օրենքի գերակայության սկզբունքի կայացման համար:
«Յուրաքանչյուրը, ով հավատում է, որ ընդհանուր ջանքերով և համարձակ գործողություններով մենք կվերականգնենք օրինականությունը Մաշտոցի պուրակում, կարող է միանալ մեր նախաձեռնությանը: Քաղաքացիական անհնազանդության մասնակից դառնալու համար անհրաժեշտ է միանալ Անհնազանդության մասին քաղաքացիների համաձայնագրին»,- նշել են մասնակիցները:
Նրանք ներկայացրել են Անհնազանդության մասին քաղաքացիների համաձայնագիրը, որը բաղկացած է 7 կետից: Կետերում նշվում են, որ իրենց քաղաքացիական անհնազանդության նպատակն է տապալել իշխանության խորին համոզմունքն առ այն, որ նա իրավունք ունի անբարեխիղճ վերաբերվել հանրության առջև ունեցած իր պարտականություններին և չարաշահել սահմանադրությամբ իրեն տրված լիազորությունները:
«Քաղաքացիական անհնազանդությունը մեր միջոցն է Մաշտոցի պուրակը ինքնակամ շինություններից առանց բռնության ազատելու համար: Մեզանից յուրաքանչյուրը պատրաստ է անբողոք կրել քաղաքացիական անհնազանդության հետևանքով իր համար առաջացած բոլոր զրկանքները»:
