«Հրապարակ». ՀՀԿ նախընտրական շտաբն ըստ էության գոյություն չունի

«Հրապարակ» օրաթերթը գրում է, որ լուրերը, թե ՀՀԿ նախընտրական շտաբի ղեկավարի տեղակալ Միքայել Մինասյանը չի այցելում ՀՀԿ նախընտրական շտաբ, չեն համապատասխանում իրականությանը: Ըստ թերթի` նա ժամանակ առ ժամանակ լինում է շտաբում, մասնավորապես երեկ տևական ժամանակ գտնվել է շտաբում: Այլ հարց է, որ ՀՀԿ նախընտրական շտաբն ըստ էության գոյություն չունի, քանի որ այդ շտաբը մատնված է անգործության, և նույնիսկ այնտեղ գնացողները դա անում են զուտ արարողակարգային իմաստով: Սերժ Սարգսյանն անձամբ և միայնակ է իրականացնում նախընտրական քարոզարշավը և շատ հազվադեպ է լինում իր նախընտրական շտաբում: ՀՀԿ վերնախավի ներկայացուցիչներն ասում են, որ նախագահ Սարգսյանը նախագահականում է հանդիպում անհրաժեշտ մարդկանց հետ, տալիս հանձնարարություններ կամ ձեռք բերում համաձայնություններ: «Շտաբի անհրաժեշտությունը վերացավ այն ժամանակ, երբ ՀՀ ընտրատարածքները բաժանվեցին ըստ մարզերի, և մարզպետները դարձան մարզային շտաբների ղեկավարներ: Հիմա նախագահ Սարգսյանն անձամբ է աշխատում մարզային շտաբների ղեկավարների հետ, որի արդյունքում կենտրոնական շտաբի անհրաժեշտությունը վերացել է»,-բացատրում է թերթի զրուցակից ՀՀԿ-ականը: Անգործության մատնված ՀՀԿ վերնախավը զբաղված է ինքնագործունեությամբ, դրա իմաստը մերթընդմերթ հարցազրույցներ տալն է, որտեղ հայտարարում են, որ իրենք համոզված են ընտրություններում ՀՀԿ-ի հաղթանակին, քանի որ այն վայելում է ժողովրդի վստահությունը: