Հայաստանի կառավարող կոալիցիան, միավորված ընդդիմությունը, ինչպես նաեւ Միավորված աշխատանքային կուսակցությունը եւ «Ժողովրդական պատգամավոր» խորհրդարանական խմբակցությունը նշել են Հայաստանում նոր քաղաքական իրավիճակ ստեղծելու անհրաժեշտությունը: Այդ մասին ասվում է Հայաստանի խորհրդարանական կուսակցությունների համատեղ հայտարարությունում, որն ընդունվել է նախօրեին ուշ երեկոյան` 5-ժամյա փակ բանակցություններից հետո: Կողմերը համաձայնվել են շարունակել քաղաքական խորհրդակցությունները եւ ձեւակերպել քննարկումների օրակարգը, որ հիմնված կլինի կոալիցիայի եւ ընդդիմության կողմից ավելի վաղ արված հայտարարությունների վրա: Ինչպես հանդիպման ավարտին լրագրողներին հայտարարել է «Արդարություն» ընդդիմադիր խմբակցության քարտուղար Վիկտոր Դալլաքյանը, քննարկվում է բանակցությունների օրակարգին առնչվող շուրջ 30 հարց, որոնց թվում են նաեւ Հայաստանի ներքաղաքական իրավիճակին առնչվող ԵԽԽՎ բանաձեւի մի քանի դրույթներ: Նշենք, որ քաղաքական խորհրդակցություններն այսօր կշարունակվեն:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
