ՀՀ տրանսպորտի եւ կապի նախարար Մանուկ Վարդանյանն այսօր ընդունել է Իրանի Իսլամական Հանրապետության դեսպան Սեյեդ Ալի Սաղաիանին, որն ավարտում է իր դիվանագիտական առաքելությունը մեր երկրում:
Ինչպես ասվում է նախարարության մամլո հաղորդագրության մեջ, դեսպանի խնդրանքով, նախարարը ներկայացրել է երկուստեք հետաքրքրություն ներկայացնող տարածաշրջանային ծրագրերի իրականացման ընթացքը եւ նշել, որ տնտեսական հարաբերությունների ակտիվացումը կարող է էապես նպաստել երկու ժողովուրդների միջեւ բազմակողմանի շփումների , բարեկամական կապերի ընդլայնմանն ու խորացմանը:
Դեսպան Սաղաիանը իր հերթին ընդգծել է Հայաստանի ճանապարհների վիճակի էապես բարելավման, ինչպես նաև ճանապարհային նշանների խնդրի լուծման ուղղությամբ կատարված դրական քայլերը:
Հանդիպման ավարտին նախարարը շնորհակալություն է հայտնել դեսպանին մեր երկրում նրա պաշտոնավարման ընթացքում իրականացված համագործակցության համար եւ հաջողություններ մաղթել հետագա գործունեության մեջ:
