ԵԱՀԿ Խորհրդարանական վեհաժողովի նախագահի հատուկ ներկայացուցիչ Գորան Լենմարկերի ղարաբաղյան հակամարտության վերաբերյալ զեկույցը, որն օրերս բանավոր ներկայացվել էր ԵԱՀԿ ԽՎ նստաշրջանում, կարելի է որակել որպես «ղարաբաղյան հակամարտության շուտափույթ կարգավորման բարի ցանկությունների» փաստաթուղթ: Այդ մասին «Արմինֆո» գործակալությանը հայտարարել է ԵԱՀԿ ԽՎ-ում Հայաստանի պատվիրակության ղեկավար, Ազգային ժողովի փոխխոսնակ Վահան Հովհաննիսյանը: Նա ընդգծել է, որ զեկույցում ոչինչ չի ասվում Ադրբեջանի տարածքային ամբողջականության կամ Լեռնային Ղարաբաղը վերադարձնելու մասին, ինչը որոշակի դժգոհություն է հարուցել ադրբեջանական պատվիրակության անդամների շրջանում: Եվ դա, հայտարարել է նա, չափազանց կարեւոր է: Միեւնույն ժամանակ, նշել է Վահան Հովհաննիսյանը, զեկույցում օգտագործվում է «օկուպացված տարածքներ» արտահայտությունը, սակայն ոչինչ չի ասվում այն մասին, թե «որ տարածքները եւ ում կողմից են դրանք օկուպացված»: «Օկուպացված տարածքներ» արտահայտությունն օգտագործվել է դրանք ականազերծելու անհրաժեշտության համատեքստում: Այսինքն խոսքը վերաբերում էր դրանք ազատելու եւ ականազերծելու անհրաժեշտությանը», – պարզաբանել է փոխխոսնակը: Նա հաղորդել է, որ Գորան Լենմարկերն առաջարկել է հայ եւ ադրբեջանցի խորհրդարանականների հաջորդ հանդիպումն անցկացնել աշնանը Բրյուսելում, եւ միայն դրանից հետո ինքը կարող է ներկայացնել Լեռնային Ղարաբաղի վերաբերյալ վերջնական զեկույցը:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
