Հայաստանի ԱԳՆ ղեկավար Վարդան Օսկանյանը եւ պաշտոնական այցով Երեւանում գտնվող նրա վրացի գործընկեր Սալոմե Զուրաբիշվիլիին քննարկել են ճանապարհների եւ տրանսպորտային միջանցքների զարգացման հարցերը որպես Հարավային Կովկասում տնտեսական զարգացման ուղիներից մեկը: Ընդ որում, ինչպես հաղորդել են ՀՀ ԱԳՆ մամլո ծառայությունում, կողմերը նշել են, որ հաղորդակցությունների համաչափ զարգացման միջոցով ինչպես Արեւմուտք-Արեւելք, այնպես էլ Հարավ-Հյուսիս ուղղություններով, հնարավոր կլինի Հարավային Կովկասը վերածել բանուկ խաչմերուկի: Նախարարները կարծիքներ են փոխանակել տարածաշրջանում առկա երկաթուղիների լիարժեք վերագործարկման հնարավորությունների շուրջ, մասնավորապես անդրադառնալով Կարս-Գյումրի-Թբիլիսի եւ Ռուսաստան-Վրաստան-Հայաստան երկաթգծի աբխազական հատվածի վերաբացմանը: Հայաստանի եւ Վրաստանի ԱԳՆ ղեկավարները անդրադարձել են նաեւ տարածաշրջանի էներգետիկ ապահովման, Իրանի հետ առանձին ծրագրերի իրականացման հարցերին: Ի դեպ, ինչպես «Ազատություն» ռադիոկայանին տված հարցազրույցում հայտարարել է Ս.Զուրաբիշվիլին, կառուցվող Իրան-Հայաստան գազամուղով իրանական գազը դեպի Վրաստան փոխադրելու հնարավորությունը հետաքրքրական է երկրի համար: Ինչպես նշել է Զուրաբիշվիլին, Վրաստանի իշխանությունները պատրաստ են ուսումնասիրել այդ գաղափարը:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
