Այսօր Ֆրանսիայում տեղի կունենա Հայ դատի պաշտպանության կոմիտեի (ՀԴՊԿ) կողմից Փարիզում Թուրքիայի գլխավոր հյուպատոսության դեմ ներկայացված հայցին առնչվող առաջին դատական նիստը: Ինչպես հաղորդել է թուրքական «Զաման» թերթը, առաջին անգամ թուրք դիվանագետը պետք է դատարանի առջեւ կանգնի «այսպես կոչված ցեղասպանության գաղափարների» պատճառով: Նշենք, որ ՀԴՊԿ-ն այս տարվա հունիսին ներկայացրած հայցում պահանջել էր պատասխանատվության ենթարկել Ֆրանսիայում Թուրքիայի գլխավոր հյուպատոսությանը` իրենց ինտերնետային կայքում Հայոց ցեղասպանությունը հերքող նյութերի հրապարակման համար, եւ փակել այդ ինտերնետային կայքը: Պաշտոնական Անկարան հույս ունի, որ հաշվի առնելով դիվանագետի անձեռնմխելիության իրավունքը` ֆրանսիական դատարանը չի բավարարի հայցը: Հակառակ պարագայում` դատավճիռը կարող է չափազանց բացասաբար անդրադառնալ թուրք-ֆրանսիական հարաբերությունների վրա:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
