ՎՏԲ Հայաստան բանկի գլխավոր մասնաշենքի մոտ այսօր «Բնախեղդ ՎՏԲ», «Գլոբալ էկոլագիական հիմնադրամը միայն հանուն բնության պահպանության, այլ ոչ թե Թեղուտի սպանդի », «Թեղուտը հանրային ունեցվածք է», «GEF don’t make a mistake» պաստառներով տասնյակ բնապահպաններ էին հավաքվել:
Բանն այն է, որ այսօր Հայաստանում իր աշխատանքներն է սկսել Գլոբալ էկոլոգիական հիմնադրամը, որը պատրաստվում է ՎՏԲ բանկի հետ համատեղ ծրագիր իրականացնել, գործընկերների ցուցակը դեռևս հաստատված չէ:
Ակցիայի կազմակերպիչներից, բնապահապան Աննա Շահնազարյանը նշում է, որ ակցիայի նպատակն է ցույց տալ ԳԷՀ-ին, որ ՎՏԲ բանկը Վալեքս գրուպի հանցակիցն է և բնապահպանության հետ որևէ կապ չունի և պետք է ԳԷՀ-ը հանի ՎՏԲ-ին հավաստագրման գործընթացից:
Ակցիայի մասնակիցները երթով շարժվեցին դեպի «Արմենիա Մարիոթ» հյուրանոց, որտեղ այս պահին շարունակվում է Գլոբալ Էկոլոգիական հիմնադրամի երկրների ընդլայնված հանդիպումը:
Բնապահպանները հյուրանոցի առջև նույնպես ներկայացրին իրենց պահանջները ԳԷՀ-ին` չհամագործակցել ՎՏԲ բանկի հետ: ԳԷՀ հանդիպմանը որպես քաղաքացիական հասարակության ներկայացուցիչ մասնակցող, Թեղուտի պաշտապանության խմբի անդամ Հասմիկ Էվոյանն էլ , ասաց, որ հանդիպամն մասնակիցները տեղեկացել են ակցիայի մասին. «Նրանք ասացին, որ ՎՏԲ բանկի հետ համագործակցության հարցը դեռևս հստակ որոշված չէ, այսօր այդ հարցերը նույնպես քննարկվելու են, այս ակցիան չի կարող անտեսվել և բնականաբար իր ազդեցությունը կունենա որոշումների կայացման գործընթացի վրա»:
