ՀՀ գլխավոր դատախազ Աղվան Հովսեփյանի հրամանով կարգապահական վարույթներ են իրականացվել մի քանի դատախազների նկատմամբ, այդ թվում նաև Երևանի դատախազ Հրաչյա Բադալյանի: Այսօր մամուլում լուրեր էին տարածվել այն մասին, որ դատախազությունը չի հրապարակում Երևանի դատախազի նկատմամբ իրականացված կարգապահական տույժի մանրամասները:
ՀՀ գլխավոր դատախազի մամուլի խոսնակ Սոնա Տռուզյանը PanARMENIAN.Net-ի թղթակցի հետ զրույցում ասաց, որ դատախազությունը հրապարակել է այն անձանց անունները, ում նկատմամբ կիրառվել է կարգապահական վարույթ: Նա նաև տեղեկացրեց, որ, մասնավորապես, Հարչյա Բադալյանին նկատողություն է արվել դատախազին ոչ վայել պահվածքի համար:
Նշենք, որ «Հրապարակ» օրաթերթն այսօր գրել էր, որ ըստ իրենց տեղեկությունների՝ դատախազության նստերից մեկի ժամանակ Բադալյանը, համաձայն չլինելով ՀՔԾ պետի հետ, տեղից միջամտել է, իսկ նիստից հետո բոլորի ներկայությամբ անվայել արտահայտություններ է արել նրա հասցեին:
«Այդքանից հետո զարմանալի է, որ սահմանափակվում են միայն նկատողություն տալով»,-գրել էր թերթը:
